Prezıdent Qasym-Jomart Toqaev eldegi veterınarıa mamandarynyń jalaqysyn arttyrý kerek ekenin aıtty. Bul týraly Qazaqstan halqyna arnalǵan joldaýynda habarlady. 

– Mal basynyń amandyǵy jáne ónimdiligi jergilikti veterınarlardyń tıimdi jumysyna baılanysty. Sondyqtan bul salada ortalyq pen óńirler arasyndaǵy mindetter men qyzmetter naqty bóliný kerek. Bul túptep kelgende aýyldaǵy aǵaıynnyń ál-aýqatyna tikeleı áser etedi, – dedi Toqaev.

Prezıdent veterınarıa qyzmeti qazirgi zaman talabyna saı bolmasa, aýyl sharýashylyǵy ónimderiniń eksportyn arttyrý múmkin emes ekenin atap ótti. Sondyqtan osy salada júıeli jumys atqarý qajet ekenin eskertti.

– Atap aıtqanda úderisterdi sıfrlandyrý jáne málimet jınaý, ony avtomattandyrý maman daıyndaý jáne olardyń jalaqysyn arttyrý týraly úkimet jyl sońyna deıin veterınarıa jumysyn reformalaý jóninde naqty sharalar qabyldaýy kerek, – dedi prezıdent.