Aqtóbeniń irgesindegi Aqjar-2 aýylynyń turǵyndary Arys pen Taraz oqıǵasy qaıtalana ma dep úreılenip otyr. Sebebi olarǵa jaqyn mańda jarylǵysh zattar qoımasy ornalasqan, dep habarlady Astana arnasy.

Aqjar-2 eldi mekeni turǵyndary jarylǵysh zattar saqtaıtyn qoımany quzyrly organdar  tekserip, qaýip bolsa, basqa jerge kóshirse eken dep otyr.

 – Arysta bolǵan nárse, Tarazda bolǵan nárse erteń taǵy qaıtalanyp júrse, sanymyzdy soǵyp qalamyz. Myna jerde úlken mektep bar. Myń jarym oryndyq mektep. Sonyń bárine qaýip tónip tur, – dedi aýyl turǵyny Járdem Qaztýǵanov.

Turǵyndardyń aıtýynsha, aýyl mańyna áskerı adamdar jıi keletin kórinedi. Qoımada snarádtar bar ekenin estip, aýyl adamdary úreılene bastaǵan. Sondyqtan quzyrly organdar kelip, qarap teksergenin qalaıdy.

– Jer astynda trotıl bolýy múmkin. Ony tek teksergennen keıin bile alamyz. Bizdiń talabymyz sol – kóshire me? Úkimet ózi qaraıdy. Jaqyn jer, trotıl jarylmasyn, jarylsa kópke deıin jetedi, – dedi Aqjar turǵyny Ǵanı Dáribaev.

Belgili bolǵandaı, Aqjar-2-degi qoıma "Qazóndirisgeofızıka" mekemesine tıesili. Tótenshe jaǵdaılar mınıstrligine qarasty ónerkásiptik qaýipsizdik komıtetiniń Aqtóbedegi ókilderi qoımadaǵy jarylǵysh zattar tek óndiristik maqsatta –munaı óndirý kezinde qoldanylatynyn aıtady. Al, qoımanyń ornalasqan jeri qaýipsizdik erejelerine saı, qashyqtyq normasy saqtalǵan. Jylyna bir ret tekseriletinin atap ótti.

– Bul aýdan jańadan salynyp jatqanda, 2000 jyldardyń basynda ol jerde úı turǵyzýǵa bolmaıdy dep tıisti organdarǵa hat jazdyq. Soǵan qaramastan, eldi-meken boı kóterdi. Ol jerde buryn 3 qoıma bolǵan. "Zapkazvzryvprom", "QazSKýbnıtrohım" jáne "Qazóndirisgeofızıka" mekemesi qoımasynan qazir tek sońǵysy qaldy, - deıd QR  TJ  Mınıstrligi ónerkásiptik qaýipsizdik komıteti Aqtóbe oblysy boıynsha departamenti dırektorynyń orynbasary Samat Tájdáýletov.

Ónerkásiptik qaýipsizdik mamandary qoımany kóshirý jóninde "Qazóndirisgeofızıka" mekemesi basshylyǵyna hat jazǵan. Másele ázirge basy ashyq kúıde tur.