Bilim jáne ǵylym mınıstrligi áleýmettik osal toptardan shyqqan 50 myńnan astam bala kolej grantyn ıelengenin habarlady.
Ótken jylmen salystyrǵanda jeńildikter boıynsha oqýǵa túsken talapkerlerdiń sany 16 myńǵa artqan.
– Bıyl alǵash ret azamattardyń áleýmettik osal toptarynan shyqqan balalardyń kolejderge túsýi úshin kvotalar engizildi. Bul jetim balalar, ata-anasynyń qamqorlyǵynsyz qalǵan balalar, kópbalaly jáne tolyq emes otbasylardan shyqqan balalar, múgedek balalar, múgedek balalardy tárbıelep otyrǵan otbasylardan shyqqan balalar, sondaı-aq UOS qatysýshylary men múgedekterine jeńildikter boıynsha teńestirilgen adamdar. Sondaı-aq kvota boıynsha memlekettik bilim granttaryn aýyl jastary da ıelendi, – dedi BǴM Tehnıkalyq jáne kásiptik bilim departamentiniń dırektory Nasymjan Ospanova.
Bıyl 9-11 synyptardyń 95 myńnan astam túlegi eldegi kolejderge oqýǵa túsken. Ásirese, medısınalyq jáne shyǵarmashylyq mamandyqtar suranysqa ıe bolǵan. Bıyl kolejderge qabyldaý 25 maýsymda bastalyp, 31 tamyzǵa deıin jalǵasty.
Granttar "aqsha stýdentpen birge júredi" qaǵıdaty boıynsha bólindi, bul jańashyldyqtardyń biri. Buryn memlekettik tapsyrys oryndaryn kolejder boıynsha komısıa bóletin bolsa, endi bul proses barynsha ashyq bola túsken. Jańa erejege sáıkes, talapker qaı kolejdi tańdasa, búdjet qarajaty da sol oqý ornyna baǵyttalady.
Sonymen qatar buryn talapkerler tek 1 mamandyq pen 1 kolejdi ǵana tańdaı alsa, bıyl túlekterge 4 mamandyq pen 4 kolejdi tańdaý múmkindigi berildi.
