Táýelsizdiktiń 30 jyldyǵyna baılanysty Qazaqstanda amnıstıa júzege asyrylady. Qylmystyq-atqarý júıesi komıteti osy jolǵy raqymshylyqqa kim ilinip bostandyqqa shyǵatynyn túsindirdi. Bul týraly Polisia.kz habarlady.

Májilisiniń depýtattary "QR Táýelsizdiginiń otyz jyldyǵyna baılanysty raqymshylyq jasaý týraly" zań jobasyn qaraýǵa kiristi.

Qarastyrylyp otyrǵan zań jobasy memleket qaýipsizdigine úlken qater tóndirmeıtin qylmystar boıynsha sottalǵan adamdardy jazadan bosatýdy maqsat etedi.

Sondaı-aq sottalýshylardyń jaza merzimi qysqartylady.

"Raqymshylyqqa ilinetin sanattaǵy adamdar tobyn qaraý kezinde qalǵan zalaldy tolyq óteýi, sondaı-aq osy zań qoldanysqa engizilgen kúni jazasyn óteýge bir jyldan aspaıtyn ýaqyt teris minez-qulyq dárejesiniń bolmaýy eskeriledi" dep habarlady QAJ komıteti.

Zań jobasy jergilikti atqarýshy organdardyń eńbekke qabiletti adamdardy jumysqa ornalastyrýyn qamtamasyz etýde, sondaı-aq bas bostandyǵynan aıyrý oryndarynan bosap shyqqandarǵa áleýmettik jáne ózge de kómek kórsetýde sharalar qabyldaýyn kózdeıdi.

Raqymshylyq kámeletke tolmaǵandarǵa jynystyq tıispeýshilikke qarsy qylmys jasaǵandarǵa, jemqorlarǵa, adam óltirgender men ekstremısterge, qylmystyq toptardyń burynǵy qatysýshylaryna qatysty qoldanylmaıdy.​

QAJ komıteti 30 jyl ishinde Qazaqstanda 8 raqymshylyq jasalǵanyn, sońǵy 4 raqymshylyq Qazaqstan Respýblıkasynyń Táýelsizdik kúnderine oraılastyrylǵanyn atap ótti.