Asfendıarov atyndaǵy qazaq ulttyq medısına ýnıversıtetiniń profesory, epıdemıolog-vaksınolog, medısına ǵylymdarynyń doktory Sáken Ámireev qaıtys boldy. Qaraly habardy S.Asfendıarov atyndaǵy Qazaq ulttyq medısına ýnıversıtetiniń baspasóz qyzmeti rastady.

"Tańerteń Qazaqstandaǵy epıdemıologıa jáne vaksınasıa mektebiniń negizin qalaýshy, medısına ǵylymdarynyń doktory, profesor Ámireev Sáken Ámireuly koronovırýstan kóz jumdy.

S.Asfendıarov atyndaǵy QazUMÝ-diń oqytýshylary, qyzmetkerleri men stýdentteri Sáken Ámireulynyń týystary men jaqyndaryna qaıǵylaryna ortaqtasyp kóńil aıtady" delingen habarlamada.

Cáken Ámireev 1940 jyly 5 qańtarda Almaty oblysy Qabanbaı (burynǵy Andreev) aýdany Muqaı aýylynda dúnıege kelgen. 1957 jyly Ekpindi orta mektebin támámdaǵan. 1958-1964 jyldary Almaty memlekettik medısına ınstıtýtynda oqyp dáriger-epıdemıolog mamany ataǵyn alǵan.

1964 jyly KSSR Densaýlyq saqtaý mınıstrliginiń mıkrobıologıa epıdemıologıa jáne gıgıena ǵylymı-zertteý ınstıtýtyna kishi ǵylymı qyzmetker bolyp qabyldanǵan. 1967-1970 jyldary AMMI aspıranty bolǵan. 1970 jyly medısına ǵylymdarynyń kandıdaty ataǵyn qorǵaǵan.

Profesor S.Ámireev brýselez problemalarynyń ártúrli salalary boıynsha 2 monografıa, 4 ǵylymı jınaq, 6 tomdyq ǵylymı-ádebıetke sholýy jaryq kórgen. 5 doktorlyq, 12-kandıdattyq dısertasıanyń ǵylymı-jetekshi, ǵylymı-keńesshi bolǵan..

Ol pandemıanyń alǵashqy kúnderinen bastap koronavırýspen kúreste aldyńǵy qatarda bolǵan.