Shymkent qalasy turǵyndaryn sapaly aýyz sýmen qamtý jumysy – qala ákimdiginiń kún tártibindegi mańyzdy máselelerdiń biri. Qazirgi ýaqytta qala turǵyndaryn sapaly aýyz sýmen qamtý jáne sý sapasyn arttyrý maqsatynda 11 eldimekende qurylys jumystary qarqyndy júrip jatyr.

Bul jyly barlyǵy 9 eldimekende qurylys jumysy aıaqtalyp, 25 myńnan astam qala turǵyny sapaly aýyz sýmen qamtylatyn bolady. Bıyl aýyz sý máselesi sheshiletin eldimekender qatarynda Nurtas shaǵyn aýdany da bar.

Qarataý aýdanyna qarasty Nurtas shaǵyn aýdanyndaǵy jańa qurylys aýmaǵyn aýyz sýmen qamtý jumysy osy jyldyń maýsym aıynan bastalǵan.

Merdiger mekeme «Turan Energo Group» JSHS tarapynan júrgizilgen qurylys jumystarynyń búginde 45 paıyzy aıaqtaldy. Joba boıynsha uzyndyǵy 40,8 shaqyrymdy quraıtyn aýyz sý qubyrynyń búginde 18,36 shaqyrymy ornatyldy.

Qarasha aıynda qurylys-montaj jumystary tolyǵymen aıaqtalyp, Nurtas shaǵyn aýdanyndaǵy 2500 turǵyn sapaly aýyz sýmen qamtylatyn bolady.