Shymkent qalasynyń turǵyny Zarına Kenshinbaeva – «Eńbek» memlekettik baǵdarlamasynyń sheńberinde bıyl 3 aılyq kásiptik oqý kýrsyna joldanǵan baǵdarlama qatysýshylarynyń biri. Ol qazir «Móldir» oqý ortalyǵynda «tiginshi» mamandyǵy boıynsha bilim alýda.

Men bala kútimimen biraz jyl jumyssyz úıde otyrýyma týra keldi. Áleýmettik jeliden qysqa merzimdi kásiptik oqytý kýrsynyń bastalatynyn estip, mamyr aıynda jumyspen qamtý ortalyǵyna baryp qujat tapsyrdym. Qazirgi tańda tiginshi mamandyǵy boıynsha bilim alyp, mundaǵy tájirıbeli sheberlerdiń arqasynda kóp nárse úırendim. Qolymnan balalarǵa arnalǵan kıim-keshek, qazaqı naqyshtaǵy qyz jasaýy, perde taǵy da basqa túrli dúnıelerdi jasaý keledi. Aldaǵy ýaqytta kýálikti alǵan soń, ózimniń jeke kásibimdi ashsam degen nıetim bar, – deıdi kóp balaly ana.

Bıyl jumyspen qamtý máseleleri jónindegi óńirlik komısıasynyń sheshimimen 600 adam jumys berýshilerdiń suranysyna sáıkes, 8 mamandyq boıynsha 11 bilim berý uıymyna jáne 1 900 adam 24 mamandyq boıynsha 18 bilim berý uıymyna oqýǵa joldandy. Al, eńbek naryǵynyń suranysyna sáıkes 30-dan astam qajetti mamandyqtar boıynsha 2500 azamat 3 aı merzimge oqýǵa joldama aldy.

Qatysýshylarǵa aı saıyn 17 myń teńge kóleminde shákirtaqy tólenedi. Oqý aıaqtalǵan soń arnaıy sertıfıkat beriledi. Sonymen qatar, oqýyn aıaqtaǵan azamattardy eńbek naryǵynyń suranysyna sáıkes bos jumys oryndaryna jumysqa ornalasýyna yqpal etiletin bolady. Byltyr 2000-ǵa jýyq adam qysqa merzimdi kásiptik oqytýdy bitirip, nátıjesinde 1590 adam jumyspen qamtylǵan.

«Eńbek» memlekettik baǵdarlamasy jumyssyz azamattardyń sanyn azaıtý, turǵyndardyń bilim-biliktiligin kóterý, eńbekke yntalandyrýdy maqsat etken. Qazirgi tańda azamattardy jumyspen qamtý maqsatynda qoldaý sharalary jetkilikti. Turǵyndar ataýly áleýmettik kómektiń aıaqqa turyp ketý úshin beriletin ýaqytsha járdem ekenin uǵynýy tıis. Sol sebepti azamattardyń memlekettik baǵdarlamalarǵa qatysyp, óz bilimin jetildirip, kásip ashýǵa umtylýdyń mańyzy zor.