Jambyldaǵy jarylys kezinde habar taratyp, jeke kásipkerdiń aýlasynda snarád shashylyp jatqanyn jelide jarıalaǵan 7 arna tilshisi Danıar Álimqul tergeýge alyndy. Bul týraly jambyldyq jýrnalıs Jasulan Ábdihalyq áleýmettik jelidegi  paraqshasynda habarlady. 

– Búgin bir qora jýrnalıs DVD men prokýratýraǵa bardyq. DVD qudaıǵa qaraǵan eken. Barǵan máselemizdi barynsha túsindirýge tyrysty. Prokýratýrań pysqyrmady. Aǵa kómekshimin degen ádemi qyz shyǵyp, "kelesi aptanyń seısenbisinde kelińder qabyldaımyz nemese áne turǵan qorapqa shaǵymdaryńdy tastańdar, boldy" dep burylyp ketti.

Baızaqtaǵy jantúrshigerlik jarylystan keıin birneshe qylmystyq is qozǵalǵan. Sonyń ishinde "BAQ paıdalaný arqyly qoǵamdyq tártipti buzý qaýpin týdyrǵan jalǵan aqparatty taratý" baby boıynsha tergeý júrgizilip jatyr. Oblystyń eki jýrnalısin DVD-ǵa shaqyryp, bireýiniń uıaly telefonyn tárkilep alypty. 4 saǵattan astam ustaǵan. Sotkasy tárkilengen 7 shi arnanyń "Aıbat" jańalyqtar qyzmetiniń tilshisi Danıar Álimqul, – dep jazdy J. Ábdihalyq.

Jýrnalıs jazbasynda Danıar Álimquldy kýáger álde kúdikti retinde shaqyrǵany túsiniksiz ekenin aıtyp, bul másele "báleniń bári Baızaqtaǵy bir depýtattyń úıinde úıilip jatqan snarádtardan bastalsa kerek" dep jazǵan.

– Bireýdiń qorasynda aınala, bala-shaǵaǵa qaýip tóndirip jatqan pálenbaı tonna metalomdy efırge shyǵardyń, sol arqyly qoǵamdyq tártipti buzyp jalǵan aqpar tarattyń, jurtty dúrliktirdiń dep aıyptasa, qolyndaǵy sotkasyn tárkilep alsa, bizdiń quzyrly organdar bitken eken. Shyraqtarym-aý, qaıta der kezinde dabyl qaǵyp eldi saqtandyryp, quzyrly organdardy qulaqtandyryp aqparat taratqany úshin sotka syılaıtyn jónderiń ǵoı. Aqparat taratýshylarmen alysqansha alapat apattyń sebebin anyqtap, kinálilerdi jazalaıtyn ýaqyttaryń boldy emes pe?!

Jalpy qazir Jambylda pıar jasaýǵa, sensasıa jasaýǵa Saparbaev pen Jylqybaev qana quqyly. Onyń ózinde tek jaqsy jaǵyn jazýyń kerek. Oblystyń olqylyǵyn aıtyp, syn jazsań jaýsyń, iritki salýshysyń, kózge shyqqan súıelsiń! Osylaı kózqaras qalyptasqan, qalyptastyrǵan. Áıtpese, bul áńgime maǵan eki kúnnen keıin jetti. Ákimdigiń de, ishki saıasatyń da, presegiń de, KNB kýratoryna deıin habardar! Ótkendegi ákimdikke kirealmaı rezonans týdyrǵan Aqbópeniń aıqaıyn bári biledi, – dep jazdy jýrnalıs.