Shymkent qalasyndaǵy balalar aýrýhanasynyń jáne №1 qalalyq aýrýhananyń mamandary 13 jastaǵy balaǵa kúrdeli ota jasady. Dárigerler jasóspirimniń tamaǵynda paıda bolǵan úlken isikti hırýrgıalyq jolmen alyp tastady. Jas pasıent eki aýrýhananyń bas dárigerleriniń kelisimimen tekserilip, aýrýhanaǵa jatqyzyldy. Bul týraly densaýlyq saqtaý basqarmasy habarlady.

Mamandardyń aıtýynsha, qalqansha bez aımaǵynda mundaı kólemdegi isikter sırek kezdesedi, al naýqasta dıametri 10 sm-ge jetken. Ony alyp tastaý operasıasy bir jarym saǵatqa sozyldy. №1 qalalyq klınıkalyq aýrýhananyń bas dárigeri Abylaı Donbaı jáne balalar aýrýhanasynyń hırýrgıalyq jumys jónindegi orynbasary Sarybaı Sultanǵalı bastaǵan hırýrgtar isikti zergerlik dáldikpen alyp tastady. Dárigerlerdiń aıtýynsha, operasıa sátti ótti. Qazir naýqastyń jaǵdaıy jaqsy.

«Qalqansha beziniń fýnksıasynyń buzylýyna baılanysty naýqasta onyń mólsheri jyl saıyn artyp kelgen. Nátıjesinde onyń ómiriniń ár kúni sońǵy bolýy múmkin edi, óıtkeni isik qalypty dem alyp, sóıleýge kedergi keltirdi», - dedi aýrýhananyń bas dárigeri Abylaı Donbaı.

Mundaı operasıa balalar aýrýhanasynda alǵash ret jasaldy. Hırýrgtar hırýrgıa kezinde bilikti mamannan baǵa jetpes tájirıbe alǵanyn, endi qalqansha bezine operasıa jasaýǵa daıyn ekenderin aıtady.

Aıta keteıik, bıyl balalar aýrýhanasynda Endokrınologıa salasy boıynsha pedıatrıalyq bólim ashyldy. Sonymen qatar, aýrýhana qarajaty esebinen endokrınolog mamandyǵy boıynsha dáriger-rezıdent daıyndalýda. Jalpy, qazir qala turǵyndary qalalyq balalar aýrýhanasynan mamandandyrylǵan kómek ala alady.