Jambyl oblysynyń polısıasy rezonans týdyrǵan vıdeony túsirgen eki jýrnalıske qatysty qylmystyq isti toqtatty, dep habarlady Zakon.kz.

Qyrkúıek aıynyń ortasynda eki BAQ ókili - Islambek Dastan (Turaninfo.kz) men Danıar Álimquldyń ("Jetinshi arna") polısıaǵa jaýap alýǵa shaqyrtý alǵany belgili boldy. Jýrnalıser ne búldirgenderin suraǵanda polısıa olardyń túsirilimderin tekserip jatqanyn aıtty.

Jambyl oblystyq prokýratýrasy "Aqparattyq júıeni paıdalana otyryp, bile tura jalǵan aqparat taratý" baby boıynsha tergeý júrgizilgenin habarlady. Tergeý 26 tamyzda Baızaq óńirinde bolǵan oqıǵalardan keıin qolǵa alynǵan.

"Sotqa deıingi tergeýdiń qolǵa alynýyna áleýmettik jelilerdi monıtorıńileý kezinde ýákiletti organ anyqtaǵan qoǵamnyń teris pikirin týǵyzǵan osy adamdardyń túsirilimi sebep boldy", delingen redaksıa saýalyna berilgen jaýapta.

Tergeý oblystyq prokýratýranyń baqylaýynda boldy. "Týyndaǵan suraqtarǵa" túsinik berý úshin BAQ ókilderimen kezdesý ótkizildi. 21 qyrkúıekte, júrgizilgen tergeý áreketteri men zertteý nátıjelerin zerdeleı kele, polısıa qylmys quramynyń joqtyǵyna baılanysty jýrnalıserge qatysty qylmystyq isterdi toqtatty.

30 tamyzda buqaralyq aqparat quraldary men áleýmettik jelilerde meıramhananyń janynda áskerı snarádtarǵa uqsas zattar jatqan vıdeo paıda boldy. Vıdeo avtory Danıar Álimqul olardy Jambyl oblysy Baızaq aýdanynan tapqanyn aıtty.

Keıinirek Qorǵanys mınıstrligi bul oq-dárilerdi joıǵannan keıingi metal qaldyqtary ekenin, onyń jeke kásiporynǵa satylǵanyn, onyń basqalarǵa eshqandaı qaýip tóndirmeıtinin atap ótti.

26 tamyzda Jambyl oblysy, Baızaq aýdanynda ornalasqan áskerı bólimdegi qoımalardyń biriniń janynda órt shyqty. Sońǵy málimetter boıynsha, jarylystan 17 adam qaıtys boldy.