Toqaev álem betpe-bet kelip otyrǵan úsh birdeı syn-qater, COVID-19 pandemıasynan keıin qaıta qalypqa kelý, klımat daǵdarysy jáne Aýǵanstandaǵy gýmanıtarlyq jaǵdaı ekenin aıtty.

– Jumyssyzdyq beleń alyp, mıllıondaǵan adam kúnkóris tabysynan aıyryldy. Qazirgi tańda 130 mıllıonnan astam adam kedeılikke tap bolyp otyr. Damý salasyndaǵy ilgerileýge ketken talaı jyldar qurdymǵa ketýi múmkin. Pandemıa kóptegen salalarda osal tustarymyzdy aıǵaqtap, mýltılateralızm men halyqaralyq yntymaqtastyqtyń asa mańyzdy ekenin anyq kórsetti. Vaksınaǵa qoljetimdiliktiń jalpyǵa ortaq ári ádil qaǵıdasyn qamtamasyz etýden bastaý qajet, – dedi prezıdent.  

Sonymen qatar prezıdent Aýǵan halqynyń taǵdyryna beı-jaı qaraı almaıtynyn, gýmanıtarlyq kómek jetkizý úshin tasymaldaý alańyn usynýǵa daıyn ekenin atap ótti. 

– Aýǵanstan óziniń halyqaralyq mindettemelerin oryndaýdy jalǵastyryp, el aýmaǵyn terrorıstter, esirtki tasymaldaýshylar men adam saýdasymen aınalysatyndardyń oshaǵyna aınaldyrmaýy tıis. Aýǵanstandaǵy aýyr gýmanıtarlyq jaǵdaıǵa basa mán berýimiz qajet. BUU mekemeleri men basqa da gýmanıtarlyq uıymdarǵa jyldam, qaýipsiz ári kedergisiz gýmanıtarlyq qoljetimdilik berilýi tıis,– dedi ol. 

Toqaevtyń sózinshe,  bıyl 270 mıllıon adam azyq-túlik tapshylyǵyn sezinedi. Qazaqstan  iri bıdaı óndirýshi jáne eksporttaýshy el. Aldaǵy ýaqytta sheteldik ınvestorlarmen jumys jasaýǵa daıyn.