Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Qazaqstannyń jańa telefon kody "+997" bolyp belgilengenin habarlaǵan bolatyn. Al, bul týraly 1999–2001 jyldar aralyǵynda Qazaqstan Kólik, telekomýnıkasıa jáne týrızm (keıinnen Kólik jáne komýnıkasıa) mınıstri bolǵan Serik Búrkitbaev "7 sany kıeli" ekenin aıtady. Eks-mınıstr bul oıyn kásipker Armanjan Baıtasovtyń Youtube arnasyna bergen suhbatynda jetkizdi.

21 qyrkúıekte Mınıstr Baǵdat Mýsın "BUU janyndaǵy Halyqaralyq elektr baılanys odaǵy Qazaqstanǵa jańa "+997" def kodyn belgiledi. Endi bizdiń elden basqa memleketke qońyraý shalǵanda, sheteldikterdiń telefonynda Qazaqstan degen jazý shyǵady. Sondaı-aq halyqaralyq deńgeıdegi sıfrly servısterdi qoldanǵanda da, barlyq jerde Qazaqstan degen sıgnal shyǵady. Kezinde KSRO taraǵanda, "+7" halyqaralyq telefon kody eki elge birdeı bekitilgen bolatyn" dep málimdegen.

Mýsınniń jańa def kod týraly jańalyǵyn  eks-mınıstr Serik Búrkitbaev synady. 

Eks-mınıstr qazirgi mınıstrdiń eshqandaı amerıka ashpaǵanyn, qazirgi def kodqa óziniń de tikeleı qatysy bar ekenin aıtty.

Búrkitbaev 1999 jyly bul máselemen jeke ózi aınalysqanyn jáne  Qazaqstandy "+7" aımaǵynda ustaý úshin kúreskenin, Qazaqstanǵa "+77" eki tańbaly telefon kodyn belgiletkenin jetkizdi. 

Eks-mınıstrdiń sózinshe, kodtaǵy birinshi san eldiń atyn emes, abonenttiń geografıalyq ornyn bildiredi. Ol "+7" Ortalyq Eýrazıanyń geografıalyq kody ekenin jetkizdi. Burynǵy Keńes Odaǵyndaǵy barlyq respýblıkalarda alǵashynda "+7" kody bolǵanyn, qazirgi ýaqytta tek Reseı men Qazaqstan ǵana qalǵanyn aıtty. Ózge postkeńestik elderdiń basqa kodqa aýysqanyn jetkizdi.

–Al biz úshin kıeli "7" sanyn saqtap qalýǵa men ózim kóp kúsh saldym. Kórshi memleketpen kelissóz júrgizip, reseılik seriktester bizge jeńildikter jasaýǵa kelisti, al biz Reseımen birge "+7" sanyn saqtap qaldyq,– deıdi eks-mınıstr.

Búrkitbaevtiń aıtýynsha Qazaqstannan shetelge qońyraý shalǵanda "Reseı" degen belgi paıda bolsa, bul bıliktiń nemquraılyǵyn bildiredi. Ol bul kemshilikti túzetý qıyn sharýa emes ekenin aıtady.

–Biz reseılikterge qarjy jaǵynan shyǵynǵa bolsa da "3" sanyn "7"-ge aýystyrýǵa daıyn ekenimizdi aıttyq. Biraq jumys biz oılaǵannan qıyn boldy. Sebebi qazirgi zamanǵy sıfrlyq múmkindikter áldeqaıda az boldy jáne beldi uıymdarmen elshilikterge hat joldap, budan bylaı Qazaqstannyń telefon kody "+77" den bastalatynyn bárine habarladyq. "+77" kody ádeıi tańdaldy, sebebi túrkiler men Qazaqtar úshin "7" sany kıeli. Nanym, senimnen bólek, "7" sanyna qatysty úlken josparlarymyz boldy,– deıdi Búrkitbaev.