Elordada «Nur Otan» partıasy men Jazýshylar Odaǵy Ózara yntymaqtastyq týraly memorandýmǵa qol qoıyp, onyń aıasynda alǵashqy shara – «Uly dala» respýblıkalyq shyǵarmashylyq baıqaýyn ótkizý, elimizdiń mádenıeti men ónerin damytý, ulttyq qundylyqtardy óristetý jaıly isterdi birlese atqarý týraly ortaq bátýaǵa keldi. Qol qoıý rásimine Jazýshylar Odaǵynyń tóraǵasy, aqyn Ulyqbek Esdáýlet, jazýshy Álibek Asqarov, aqyndar Nesipbek Aıtuly, Dáýletkereı Kápuly syndy qalamgerler, Parlament Májilisiniń depýtattary, «Nur Otan» partıasynyń basshylyǵy qatysyp, Memorandým sheńberinde alda atqarylatyn jobalardy pysyqtady.

Jıynda partıa tóraǵasynyń birinshi orynbasary Baýyrjan Baıbek eki uıymnyń memlekettik jáne ulttyq qundylyqtardy dáripteýde maqsattarynyń toǵysatyn tustary kóp ekenin alǵa tartty. Ol ekijaqty memorandýmǵa qol qoıyp, Elbasy qoıǵan mindetterdi birlese júzege asyrý josparlanyp otyrǵanyn jetkizdi.

– Bıyl – elimiz úshin aıshyqty jyl. Osy 30 jylda biz Qazaqstannyń Tuńǵysh Prezıdenti – Elbasy Nursultan Ábishuly Nazarbaevtyń basshylyǵymen memlekettiligimizdiń irgesin bekitip, shekaramyzdy shegendedik, ishki-syrtqy damýdaǵy basty baǵyttarymyzdy aıqyndadyq. Memleket basshysy Qasym-Jomart Kemeluly Toqaevtyń basshylyǵymen saıası-ekonomıkalyq reformalar odan ári jalǵasyp jatyr. Eldiń damýy týraly aıtqanda, áleýmettik-ekonomıkalyq kórsetkishter ǵana emes, rýhanıat máseleleri de udaıy nazarda bolýy tıis. Sebebi Táýelsizdiktiń basty qundylyqtaryn eksheıtin, onyń mánin óskeleń urpaqqa jetkizetin – ádebıet pen óner ókilderi, – dedi Baýyrjan Baıbek.

Onyń aıtýynsha, Memorandýmǵa qol qoıýdaǵy basty maqsat – elimizdiń mádenıetin damytý, eldiń ıntellektýaldyq óresin kóterip, estetıkalyq talǵamyn ushtaý, sondaı-aq, qazirgi zamanǵy jazýshylar men aqyndardyń shyǵarmashylyǵyn nasıhattaý arqyly qazaq ádebıetiniń jáne poezıasynyń damýyn yntalandyrýǵa baǵyttalǵan birlesken is-sharalardy júzege asyrý.

Osy oraıda partıa tóraǵasynyń birinshi orynbasary Jazýshylar Odaǵymen birlese otyryp, jas jazýshylar men aqyndar arasynda ótetin bıylǵy «Uly dala» baıqaýynyń máni men mazmunyna toqtaldy. Baıqaýdyń maqsaty – Táýelsizdiktiń alǵashqy 30 jylynda elimizdiń jetken jetistikterin, memleket irgesin bekitýdegi Qazaqstannyń Tuńǵysh Prezıdenti – Elbasy Nursultan Ábishuly Nazarbaevtyń jasampaz rólin aıshyqtaý jáne qoǵamdy rýhanı jańǵyrtýdyń ıdeıalary men qundylyǵyn kórsetetin qazirgi zamanǵy qazaqstandyq avtorlardyń shyǵarmalaryn qoldaý jáne nasıhattaý.

Baıqaý «Proza», «Poezıa», «Dramatýrgıa», «Kórkem fılm men teleserıal senarıi»», «Balalarǵa arnalǵan shyǵarma» atty bes nomınasıa boıynsha ótkizilip, árqaısysy boıynsha 3 júldeli oryn anyqtalady.

Birinshi oryn (1 júlde) úshin – 1 000 000 teńge, ekinshi orynǵa (1 júlde) – 750 000 teńge, úshinshi orynǵa (1 júlde) – 500 000 teńge júlde belgilenip otyr.

Baıqaýǵa 18-den 40 jasqa deıingi aqyndar, jazýshylar, dramatýrgter men senarıster qatysa alady.

Óz kezeginde Qazaqstan Jazýshylar Odaǵy basqarmasynyń tóraǵasy Ulyqbek Esdáýlet osyndaı baıqaýlardyń «júzden júırik, myńnan tulpar» talanttardyń iriktelip, kópshilikke tanylýyna septesetinin alǵa tartty. Ol el ishindegi talanttardyń tanylýyn yntalandyryp, shyǵarmashylyqqa, ónerge, mádenıetke udaıy qamqorlyq tanytatyn partıa basshylyǵyna jazýshylar qaýymynyń atynan rızashylyǵyn bildirdi.

– 30 jylda bizdiń jetken jetistikterimiz, irkilisterimiz, jemisterimiz ben jeńisterimiz, daǵdarys pen kidiris deıtin máselelerdi qalaı eńserip, qalaı jeńgenimiz, qandaı bıikterge shyqqanymyz sonyń barlyǵy sıfrlarda saırap jatqanynmen, olardy shyǵarmashylyq adamdarynyń júreginiń domnasynda qorytyp, obrazǵa orap, kórkem tilmen beınelep, halyqqa kórkem shyǵarma retinde usynyp jatsa, ol urpaqtardyń kóńili men júreginde máńgilik qalatyny sózsiz. Al Memorandým oıǵa alǵan isterdi zańdastyryp beretin qujat bolǵandyqtan, oǵan biz qýana qol qoıamyz. Baıqaýdyń erejesi de kóńilimizden shyǵyp otyr. Bes janr boıynsha bes nomınasıa belgilengen. Teleserıal senarıi boıynsha nomınasıa taǵaıyndaý buryn bolǵan emes. Budan bólek bıylǵy jyl Prezıdenttiń jarlyǵymen «Balalar men jasóspirimderdiń kitap oqýyn qoldaý jyly» bolyp jarıalanǵanyn bilesizder. Osy oraıda balalar ádebıetine de arnaıy nomınasıanyń arnalyp otyrǵany óte quptarlyq. Balalar ádebıeti osyndaı qamqorlyqtyń arqasynda bir belesten asyp jatsa, dúnıege balalar súıip oqıtyn shyǵarmalar, jańa klasıka kelip jatsa, onda «Nur Otan» partıasy men Jazýshylar odaǵynyń birlesken jobasynyń muratyna jetkeni, – dedi U.Esdáýlet.

Al «Uly dala» baıqaýy komısıasynyń tóraǵasy, belgili jazýshy Álibek Asqarov osyndaı shyǵarmashylyq baıqaýlardyń mańyzyna toqtalyp, oǵan túsken júzdegen shyǵarmanyń arasynan bir-eki úzdik týyndy anyqtalyp jatsa, onyń ózi rýhanıatymyz úshin úlken jetistik sanalatynyn aıtty.

Sodan keıin sóz alǵan Parlament Májilisiniń depýtaty, «Nur Otan» partıasy janyndaǵy Respýblıkalyq «Miras» qoǵamdyq keńesiniń tóraǵasy, aqyn Janarbek Áshimjan partıanyń «Ózgerister joly: Ár azamatqa laıyqty ómir!» saılaýaldy baǵdarlamasynda rýhanıat pen mádenıetke tıisti nazar aýdarylyp, birshama jobalar júzege asqanyn alǵa tartty.

«Respýblıkalyq «Miras» keńesiniń osyǵan deıin eki jıyny ótti. Sol jıynda Úkimetke naqty 28 usynys berilgen. Olardyń qazir 25-i júzege asyp, sol boıynsha jumys istep jatyrmyz. Úsh usynysymyz boıynsha zańnamaǵa ózgerister kerek. Zań jobalary jeltoqsan aıynda kelip túsedi. Sol zańnamalarǵa ózgerister eńgizilgennen keıin, ásirese, dýblájǵa qatysty máseleniń sheshimin tabamyz dep oılaımyn. Sondyqtan búgin Memorandýmnyń qabyldanýy erteń qoǵamda óziniń laıyqty baǵasyn alady jáne jańa nomınasıalardyń qosylýy bul zamanaýı kınoındýstrıaǵa, dýblájǵa qatysty máselelerdiń sheshilýine septigin tıgizedi», – dedi J.Áshimjan.

Osy oraıda partıa Tóraǵasynyń birinshi orynbasary zıaly qaýymnyń qoǵamdyq ómirdegi belsendiligi óte joǵary ekenin atap ótti. Onyń aıtýynsha, 2020 jyly partıa ótkizgen praımerızge respýblıka boıynsha 350-den asa qalamger, pýblısıs, aıtysker, jýrnalıs qatysqan.

«Nur Otan» partıasynyń saılaýaldy baǵdarlamasynyń aıasynda daıyndalǵan Jol kartasy boıynsha elimizde 2025 jylǵa deıin 259 mádenıet oshaǵy salynady, 1241 mádenı nysan jóndeýden ótkizilip, 150 nysanǵa ǵylymı restavrasıa jumystary júrgiziledi. Shet elderde «Abaı» ortalyqtarynyń sany artady. Sondaı-aq partıa 1500 mádenıet, óner jáne ǵylym qaıratkerin jyl saıynǵy memlekettik áleýmettik tapsyrys aıasynda qoldaýdyń jáne qarajat bólýdiń ashyqtyǵyn qamtamasyz etedi. Taǵy bir jańalyq – biz bıyldan bastap «Ulttyq Mura» partıalyq jobasyn bekitip, barlyq mádenı-ádebı sharalardy keshendi túrde atqarýǵa kiristik», - dedi Baýyrjan Baıbek.

Eske sala keteıik, «Uly dala» baıqaýy 2019 jyly ótkizilip, oǵan 700-den astam shyǵarma túsken bolatyn. Olardyń ishinen 400 shyǵarma iriktelip, 5 nomınasıa boıynsha elimizdiń túkpir-túkpirinen talantty 15 jas qalamger júldeger atandy. Tek sońǵy bir jarym jylda koronavırýs pandemıasynyń saldarynan biraz ádebı-mádenı jobalar toqtap qaldy.

Baıqaýdyń sharttary buqaralyq aqparat quraldarynda, partıanyń resmı saıtynda jáne áleýmettik jelilerdegi resmı akkaýnttarynda, sondaı-aq aikyn.kz saıtynda, «Miras» partıalyq jobasynyń Facebook paraqshasynda jarıalanady.

Baıqaýǵa qatysý úshin jumystardy qabyldaý 2021 jylǵy 1 qazan men 30 qarasha aralyǵynda júzege asyrylady. Kelip túsken jumystar aikyn.kz saıtynda «Uly Dala» aıdary aıasynda jarıalanady. Jeńimpazdardy marapattaý rásimi Qazaqstan Respýblıkasynyń Táýelsizdigi kúni qarsańynda Nur-Sultan qalasynda ótedi.