Búgin parlament májilisindegi úkimet saǵatynda densaýlyq saqtaý mınıstri Alekseı Soı bıyl elde birqatar qaýipti aýrýlar tirkelmegenin habarlady.

– 2021 jylǵy 8 aıda oba, tyrysqaq, ish súzegi, paratıf, týláremıa, dıfterıa, qyzamyq, polıomıelıt, sirespe aýrýlary tirkelgen joq. 2020 jyldyń osyndaı kezeńimen salystyrǵanda, 23 nozologıa boıynsha syrqattanýshylyqtyń, onyń ishinde jiti vırýstyq gepatıttermen 3 ese, menıngokok ınfeksıasymen 2,6 esege tómendeýi baıqaldy. Bıyl qyzylshamen syrqattanýshylyq birli-jarym jaǵdaıǵa deıin tómendedi, – dedi A. Soı.

Qazaqstan Respýblıkasynyń aýmaǵynda asa qaýipti ınfeksıalardyń tabıǵı oshaqtary: oba, týláremıa, sibir jarasynyń, Kongo-Qyrym gemorragıalyq qyzbasynyń, búırek sındromy bar gemorragıalyq qyzbanyń jáne basqalardyń topyraqtaǵy oshaqtary bar.

– Obanyń tabıǵı oshaqtary respýblıka aýmaǵynyń 39%-yn alyp jatyr. Obaǵa qarsy qyzmet jyl saıyn epızootologıalyq monıtorıń júrgizedi jáne tabıǵı oshaqtardyń belsendiligi anyqtalatyn aýmaqtarda profılaktıkalyq is-sharalar, onyń ishinde vaksınasıa júrgiziledi, – dedi densaýlyq saqtaý mınıstri.

Mınıstr sońǵy 3 jylda Kongo-Qyrym gemorragıalyq qyzbasymen syrqattaný bir deńgeıde saqtalatynyn eske saldy. Jyldyń ótken kezeńinde aýrýdyń 18 rastalǵan jaǵdaıy anyqtalǵan. Jyl saıyn halyq arasynda sibir jarasynyń kezdeısoq jaǵdaılary tirkeledi. 2021 jyldyń ótken kezeńinde 6 oblystyń turǵyndary arasynda sibir jarasynyń 17 jaǵdaıy tirkelgen.