Ulttyq bank tóraǵasy Erbolat Dosaev Qazaqstannyń 13 oblysynda jyldyq ınflásıa jyldam ósip jatqanyn aıtty.

– Kókónis baǵasynyń 8,7%-ǵa jáne jemis baǵasynyń 2,4%-ǵa maýsymdyq tómendeýine qaramastan, Qazaqstanda ınflásıa 8,9%-ǵa jetip, jyldamdaýyn jalǵastyrdy, –  dedi Dosaev úkimet otyrysynda.

Aıtýynsha, monetarlyq emes faktorlardy turaqtandyrý úshin bıyl qyrkúıekte úkimet ákimdermen birlesip ınflásıaǵa qarsy den qoıý sharalary keshenin iske asyra bastaǵan. Sonyń nátıjesinde áleýmettik mańyzdy azyq-túlik taýarlary baǵasy tamyzdaǵy eń joǵary 10,4%dan qyrkúıekte 9,6%-ǵa deıin tómendegen.

Alaıda qazannyń birinshi aptasynyń qorytyndysy boıynsha baǵa taǵy da ósip, jyl basynan beri 9,9%-dy qurady. Áleýmettik mańyzdy azyq-túliktiń qymbattaýyna jumyrtqa, taýyq eti, qyryqqabat, qant pen sıyr eti baǵasynyń ósýi áser etken.

– Qyrkúıekte dızel otynynyń baǵasy 3,8%-ǵa ósti, al jekelegen oblystarda 10%-dan asty. Óndiristiń ulǵaıýy men eksporttyń toqtaýyna qaramastan, dızel otynynyń tapshylyǵy baıqalýda. Bul ınflásıalyq qysymdy kúsheıtip, basqa taýarlarǵa janama áser etip jatyr, – dedi Dosaev.

Ulttyq bank tóraǵasy ótken aıda 17 óńirdiń 13-inde jyldyq ınflásıa jedeldegenin málimdedi. Alty oblysta ınflásıa 9%-dan asqan.

Dosaev ınflásıany "ustap turý" úshin óńirlik naryqtarda baǵany turaqtandyryp, taýarlar tapshylyǵyna jol bermeý kerek ekenin aıtty.