Qazaqstan Respýblıkasynyń Táýelsizdigine 30 jyldyǵyna oraı jáne «Birtutas ult – birtutas ásker» baǵdarlamasy aıasynda «Aıbyn – 2021» VII respýblıkalyq áskerı-patrıottyq jastar jıynynyń ashylý saltanaty onlaın formatta ótti.

Saltanatty sharaǵa QR Premer-mınıstriniń orynbasary E.Toǵjanov pen birqatar vedomostvo ókilderi qatysty. Al, respýblıkanyń barlyq óńirinen ozyq shyǵyp, iriktelgen áskerı-patrıottyq klýbtar beıne-konferensıa arqyly baılanysty. Olardyń qatarynda QR QK áskerı bólimderiniń, áskerı mektepter men bilim basqarmalaryna qarasty mektepterden quralǵan 74 komanda bar.

Shymkent qalasynyń qorǵanys isteri jónindegi departamenti men qalalyq bilim basqarmasynyń uıymdastyrýymen shymkenttik jas sarbazdar beıne-baılanysqa Kórme ortalyǵynan shyqty. Jıynǵa Shymkent qalasy ákiminiń Qorǵanys isteri jónindegi keńesshisi T.Bıdaıbekov, Shymkent qalasy Qorǵanys isteri departamenti basshysynyń tárbıe jáne ıdeologıa jumystary jónindegi orynbasary R.Madıarov, Shymkent qalasy bilim basqarmasynyń basshysy J.Tájıeva qatysty.

Shymkent qalasyndaǵy bilim mekemeleri arasynan irikteý kezeńinen súrinbeı ótken №52 mektep-lıseıdiń «Barys», №68 jalpy orta mektebiniń «Suńqar», №99 mektep-gımnazıanyń «Arystan» áskerı-patrıottyq klýbtary men «Jas sarbaz» áskerı-patrıottyq qozǵalysynyń tárbıelenýshileri beıne-baılanys arqyly QR Premer-mınıstriniń orynbasary E.Toǵjanovtyń quttyqtaý sózin tyńdady.

Jastar arasyndaǵy áskerı-patrıottyq tárbıeni jetildirý, QR Qarýly kúshteriniń mártebesin kóterip, áskerı qyzmetti nasıhattaýǵa baǵyttalǵan saıys respýblıkanyń túkpir-túkpirinde 6-22 qazan aralyǵynda arnaıy kestege sáıkes ótkizilip, 30 qazanda qorytyndysy jarıalanbaq. Shymkent qalalyq bilim basqarmasynan qatysyp otyrǵan ár áskerı-patrıottyq klýbtyń quramynda 10 ul, 5 qyz bala bar. Olar zıatkerlik oıyny, chellenjder baıqaýy, shyǵarmashylyq, ónertapqyshtyq, sporttyq jáne alǵashqy medısınalyq kómek kórsetý syndy túrli saıystarda baq synaıdy.