Prezıdent Qasym-Jomart Toqaev Elbasy Nursultan Nazarbaevtyń kandıdatýrasyn Azıadaǵy ózara is-qımyl jáne senim sharalary jónindegi keńes janyndaǵy ǵulamalar keńesiniń basshysy laýazymyna usyndy, dep jazady sputnik.kz saıty.

Astanada Azıadaǵy ózara is-qımyl jáne senim sharalary jónindegi keńeske múshe elderdiń syrtqy ister mınıstrleriniń kezdesýi ótip jatyr.

Qazaqstannyń syrtqy ister mınıstriniń orynbasary Aqan Rahmetýllınniń aıtýynsha, seısenbide elder keńes janyndaǵy konsýltatıvtik-keńesshi organ – Ǵulamalar keńesi týraly erejeni qabyldaýǵa tıis.

– Múshe memleketter ǵulamalar keńesin qurýdy qoldady jáne úmitkerlerdi usyna bastady. Búgin biz ǵulamalar keńesi týraly ereje bekitemiz. Tańerteń bizben kezdesý barysynda prezıdent Qasym-Jomart Toqaev Azıadaǵy ózara is-qımyl jáne senim sharalary jónindegi keńes quryltaıshysy Nursultan Nazarbaevty ǵulamalar keńesiniń basshysy qyzmetine usyndy, sizder bul kandıdatýrany bekitesizder dep úmittenemin, – dedi Rahmetýllın kezdesýge qatysýshylarǵa.

Qasym-Jomart Toqaev2019 jyly Azıadaǵy ózara is-qımyl jáne senim sharalary jónindegi keńestiń 5 samıtine qatysqan. Sol jıynda Ǵulamalar keńesin qurý máselesin jan-jaqty zertteý mańyzdy ekenin aıtty.

– Turaqty jumys isteıtin dıalogty platformany qaıta qurý arqyly Azıadaǵy ózara is-qımyl jáne senim sharalary jónindegi keńestiń taldaý ortalyqtarynyń áleýetin arttyrǵan jón. Keńestiń jumys organdaryna arnalǵan usynystardy jandandyrýǵa múmkindik beretin Ǵulamalar keńesin qurý máselesin ýaqytyly ári jan-jaqty zertteý kerek dep esepteımiz, – dedi Qazaqstan prezıdenti.