Shymkent qalasy Polısıa departamentiniń bastyǵy Eraly Jýmahanbetovtiń bastamasymen qaladaǵy barlyq mekteptiń aldynda Iývenaldy polısıa qyzmetkerleri úsh aýysymdy kezekshilikke turady.

Ondaǵy maqsat - balalardyń qatysýymen bolatyn jol-kólik oqıǵalarynyń aldyn alý. Mektep aýmaǵynda quqyqtyq tártipti qamtamasyz etý, avtokólik júrgizýshileriniń, ásirese mektep mańynda, jol qozǵalysy erejelerin buzýǵa jol bermeý deıdi tártip saqshylary. Saqtyq sharalary týraly áriptesim Maqpal Rysbaeva baıandaıdy.

1 qyrkúıekten bastap Polısıa departamentiniń qyzmetkerleri qala mektepteriniń mańynda tabannan tik turyp, oqýshylardyń qaýipsizdigin qamtamassyz etedi. Ózdiginen joldan óte almaıtyn kishkentaı balǵyndarǵa polıseıler kómekke keledi. Turǵyndar jol boıynda kezekshiliktiń uıymdastyrylýy mektepke balalaryn tası almaıtyn jumysbasty ata-analar úshin tıimdi deıdi.

Jolǵa jaqyn ornalasqan bilim oshaqtary aýmaǵynda jol belgileriniń ornalasýy, retteý tańbalary men quraldardyń sapasy da erekshe nazarda. Tártip saqshylary mektep mańaılarynda 3 aýysymmen kezekshilikke shyǵady.

Nurlan Ermekbaev, Shymkent qalasy jol polısıasy qyzmeti basqarmasynyń ınspektory
- Jasóspirimderdiń jáne jaıaý júrginshilerdiń jolda júrý qaýipsizdigin qamtamasyz etý jáne olarǵa jolda júrý erejelerin túsindirý maqsatynda, kúndelikti tańǵy saǵat 07:30-08:30, túski saǵat 12:30-14:30 jáne keshki saǵat 17:30-19:30 ýaqyt aralyǵynda mektep ınspektorlary men patrúldik polısıa qyzmetkerleri qala aýmaǵyndaǵy barlyq mekteptiń mańyndaǵy joldardan oqýshylardyń qaýipsiz ótýin qamtamasyz etý baǵytynda qyzmet atqarady.

Aıta keteıik, qalada 23-31 tamyz aralyǵynda «Abaılańyz, balalar» atty jedel profılaktıkalyq is-sharasy ótken bolatyn. Shara kezinde tártip saqshylary jol júrý erejelerin buzýǵa 7 myńnan astam jáıtti anyqtaǵan. Mektep mańyndaǵy kóshelerde 140 jol belgileri ornatylyp, 15 jasandy jol kedergileri qoıylypty.