Reseı prezıdenti Vladımır Pýtın "Novaıa gazeta" gazetindegi jumysy úshin jaqynda Nobel syılyǵyn alǵan jýrnalıs Dmıtrıı Mýratovqa eskertý jasady.

"Eger Nobel syılyǵyn Reseı zańdaryn buzatyn qalqan retinde qoldanǵysy kelse, ol muny sanaly túrde jasaıdy" degen Pýtın Mýratovtyń Reseı zańdaryn buzbasa, "shetel agenti" dep aıyptalmaıtynyn jetkizdi.

Kreml buǵan deıin Mýratovty marapatymen quttyqtaǵan. Jýrnalıs Nobel syılyǵynyń aqshasy ony "sheteldik agent" dep jarıalaýǵa negiz bolmaıtynyna senimdi ekenin aıtqan.

Kremldiń daý týǵyzǵan zańy boıynsha, Reseıdegi BAQ pen úkimettik emes uıymdar shetelden qarjylyq kómek alatyn bolsa, "sheteldik agent" retinde qarastyrylady. Synshylar bul zańdy Máskeý óziniń saıası jaýlary men táýelsiz BAQ-tarǵa qarsy qoldanatyn qural dep sanaıdy.

Mýratov Reseı úkimeti ne istese de, syılyqtan bas tartpaıtynyn aıtty.

"Men Pasternak emespin" dedi Mýratov reseılik Interfaks agenttigine bergen suhbatynda. Borıs Pasternak 1958 jyly Nobel ádebıet syılyǵyn alǵan, biraq sol kezdegi Keńes úkimeti ony syılyqtan bas tartýǵa májbúrlegen.

"Memleket qalaǵanyn jasaı alady, biraq biz syılyqty qabyldaımyz; biz syılyqtan bas tartpaımyz" dedi Mýratov.

Mýratov syılyqty Reseıde qaza tapqan alty jýrnalıske arnaıtynyn aıtqan.

Norvegıa Nobel komıteti ótken juma kúni Mýratov pen fılıppındik jýrnalıs Marıa Ressaǵa Nobel syılyǵyn tabys etken. Ekeýi de óz elderinde sóz bostandyǵy úshin tabandylyqpen kúreskeni úshin marapattaldy.