Mańǵystaý oblysy Munaıly aýdanyna qarasty Qyzyltóbe aýyly turǵyndary jer astymen tartylǵan gaz qubyrynyń tozyǵy jetkenin, tipti kógildir otynnyń ıisi múńkip turǵanyn aıtyp shaǵymdanady, dep habarlady Eýrazıa birinshi arnasy.

"Alda-jalda jarylyp ketse, úlken tragedıaǵa tap bolamyz" dep qorqatyn jurt qubyrlardy standartqa saı etip jer ústimen júrgizip berse deıdi.

– Jaz kúnderi ıis endi nevozmojno. Balalarymyzdan qorqamyz. Kóshede oınaıdy. Bir jerin qozǵap kete me, jarylyp kete me dep, – deıdi Roza Musaǵalıeva Qyzyltóbe aýylynyń turǵyny. 

Aýdan ákiminiń orynbasary Nurbek Qarasaev máseleni sheshý jumystary qolǵa alynǵanyn aıtty. 

Eske salsaq, keshe Kókshetaýda Kóktem shaǵyn aýdanyndaǵy turǵyn úı kesheniniń 2-qabatynda gaz balony jaryldy. Turǵyndar birneshe apta ortalyqtandyrylǵan gaz bolmaǵandyqtan, gaz balondardy paıdalanǵan.

Tótenshe jaǵdaı saldarynan eki adam zardap shekken. Biriniń denesin 18 paıyzǵa deıin kúıik shalǵan. Qazir ekeýi de aýrýhanada em qabyldaýda.