Aqparattyq habarlamada atalǵan kómek naqty derekter negizinde vaksınalardy engizý boıynsha sheshimder qabyldaýǵa, vaksınalar týraly jalǵan aqparatqa den qoıý boıynsha jergilikti áleýetti damytýǵa, COVID-19 naqtylaýdy júzege asyrý úshin zerthanalyq júıelerdi jetildirýge, sondaı-aq, Qazaqstannyń vaksınalardy paıdalanýǵa daıyndyǵyn arttyrýǵa jáne olardy jetkizý prosedýralaryn jetildirýge yqpal etetin bolatyny aıtylady.

"Bul kómek pandemıa bastalǵannan beri Covid-19 indetine qarsy kúres baǵdarlamasy sheńberinde Qazaqstanǵa jiberilgen 6,8 mıllıon AQSH dollarynan astam mólsherdegi qarjylandyrýdy tolyqtyratyn bolady. Búgingi tańda USAID 5000 astam medısına qyzmetkerine COVID-19 indetine baılanysty taqyryptar boıynsha, sonyń ishinde aýrýdyń aldyn-alý jáne baqylaý, sonymen qatar bıologıalyq qaýipsizdikti qamtamasyz etý prınsıpteri boıynsha oqytýdy uıymdastyrdy. Óz qyzmetinde USAID halyqtyń habardarlyǵyn arttyrý jáne jalǵan aqparatpen kúresý úshin belsendi toptardy jumyldyrý arqyly 8,2 mıllıonnan astam adamdy qamtydy" delingen aqparattyq habarlamada.

Eki onjyldyqtan astam ýaqyt barysynda AQSH Qazaqstanǵa 2 mıllıard dollar, sonyń ishinde týberkýlez ben AITV/JITS aldyn alý jáne emdeý sıaqty salalardaǵy densaýlyq saqtaý baǵdarlamalaryn qoldaýǵa 92,8 mıllıon dollardan astam qarajat bólgen.