Semeı qalasy ákiminiń orynbasary Dmıtrıı Garıkov, bilim jáne ǵylym mınıstri Asqat Aımaǵambetovtyń muǵalimderdi senbilikke shyǵarýǵa qatysty jazbasyna pikir bildirdi, dep habarlady Saryarqanews saıty.
Ol qalalyq senbiliktiń 16 qazan kúni ótkenin jáne oǵan qalanyń barlyq mektebi qatysqanyn jetkizdi.
– Atalǵan hatta sabaqty nemese oqý prosesin toqtatý týraly nusqaýlyq bolǵan joq. Bir mekteptiń dırektory eńbek demalysynda bolǵan, ornyna orynbasary sheshim qabyldaǵan. Biraq sabaq toqtaǵan joq, onlaın túrde ótti, – dedi Garıkov.
Sondaı-aq ákim orynbasary bilim jáne ǵylym mınıstri Asqat Aımaǵambetovtyń jazbasyna qatysty pikir bildirdi.
– Keıbir memlekettik qyzmetkerlerdiń pikirine keler bolsaq, eger biz ustazdardy bir ret kúzde bolatyn búkil qalalyq senbilikke shaqyrǵan bolsaq, ákimdik qyzmetkerleri ár apta saıyn senbilikke shyǵady. Bul jerden aıtarlyqtaı eshteńe kórip turǵanym joq. Bul – bizdiń qala, biz qalamyz úshin tyrysamyz, menińshe kez-kelgen qalanyń janashyr adamy bul senbilikke qýana-qýana atsalysady.
Eshkimdi qınaǵan joqpyz. Bizde arnaıy hattamalar bar. Onda ár dırektor qyzmetkerlerimen qosymsha jumys istý men ústemaqyny ózderi sheshedi, – dedi ol.
Pikir qaldyrý