2023 jylǵa qaraı muǵalimderdiń jalaqysy eki ese kóbeıedi. Mundaı josparlar Nur Otan partıasy janyndaǵy Bilim men ǵylymdy damytýdyń respýblıkalyq qoǵamdyq keńesiniń otyrysynda aıtyldy, dep habarlady Astana TV arnasy.

Telearnanyń habarlaýynsha, qazirdiń ózinde ustazdardyń jalaqysy 30 paıyzdan 50 paıyzǵa deıin ósken.

Sondaı-aq synyp jetekshiligine, tálimgerlikke, magıstratýraǵa, aǵylshyn tilinde pánderdi oqytýǵa tólenetin qosymsha tólemder ulǵaıtylǵan. Pedagogıkalyq etıka men muǵalimderdiń quqyqtaryn qorǵaý máseleleri boıynsha arnaıy keńester qurylǵan.

Sonymen qatar keńes músheleri bilim salasyndaǵy problemalardy da atap ótti. Osy jyldyń sońyna deıin elordada qurylys júrip jatqan keıbir mektep ýaqytynan kesh tapsyrylýy múmkin. Oǵan qosa, pedagogıkalyq kadrlardyń jetispeýshiligi jalǵasýda, salaǵa 700-den astam maman qajet.

– Bıyl 75 myńnan asa pedagogty qamtıtyn 1000-ǵa tarta biliktilikti arttyrý kýrsy josparlanyp, tıisti túrde qarjylandyryldy. 2020-2023 jyldary aralyǵynda biliktilikti arttyrý kýrstarynyń bilim berý saraptamasyn júrgizý úshin saraptamalyq keńester quryldy, – dedi bilim jáne ǵylym vıse-mınıstri Sholpan Karınova.