Jýyrda túrme jazasy jeńildetilip, úıine jiberilgen dıssıdent aqyn Aron Atabek reanımasıaǵa tústi. Bul jóninde Aron Atabektiń qaryndasy Rázıa Nutysheva habarlady.

Onyń aıtýynsha, Aron Atabek qazir Almatydaǵy jeke klınıkalardyń birinde jatyr.

– Iá, ol shynymen, aýrýhanaǵa jatqyzyldy. Qaı aýrýhana ekenin aıta almaımyz, ol jeke klınıkada. Jaǵdaıy onsha emes, óıtkeni jansaqtaý bóliminde jatyr, – dedi Atabektiń ápkesi.

Bıyl 1 qazanda Pavlodar soty 2006 jylǵy Shańyraq oqıǵasynan keıin 18 jylǵa sottalǵan Aron Atabektiń qalǵan jaza merzimin bostandyǵyn shekteý jazasyna aýystyryp, aqyndy "densaýlyq jaǵdaıyna baılanysty" túrmeden shyǵarǵan.

5 qazan kúni belsendiniń jaǵdaıy kúrt nasharlap, aýrýhanaǵa shuǵyl jetkizilgen. Keıin Atabektiń aýrýhanaǵa jatýdan bas tartqany belgili boldy. Artynsha ol úıinde jasandy tynys alý apparatymen demalyp jatqany habarlandy.

10 qazan kúni bir top belsendi Aron Atabek kitabynyń tusaýkeserin ótkizdi. Olar týyndyny Aron Atabektiń bostandyqqa shyǵýyna oraı jasalǵan syılyq ekenin aıtqan.

Aron Atabek 15 jyldan astam ýaqyt túrmede otyrdy. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısıa qyzmetkeriniń ólimine aıypty dep tanyǵan.