Shymkentte Jumat Shanın atyndaǵy akademıalyq drama teatrynda Shámshi Qaldaıaqovtyń ánimen órilgen «Syǵan serenadasy» kórermen nazaryna usynyldy.

Aqyn, dramatýrg Israıl Saparbaıdyń poetıkalyq mýzykalyq dramasynda Sh.Qaldaıaqovtyń ómiri men ásirese án padıshasynyń jurtshylyqqa belgisiz tustary baıandalǵan. Dramanyń bas qoıýshy-rejısseri – Qýandyq Qasymov.

Oqıǵa jelisi boıynsha jas Shámshiniń Izolda esimdi syǵan qyzyna ǵashyq bolǵany, kóship-qonyp júrgen halyqtyń qazaq jerinen keter tusta ǵashyqtar qımastyqpen qoshtasady. Sebebi, Shámshi týǵan jerin, elin tastap, súıgenine erip kete almaıdy. Osylaısha, qos júrektiń mahabbatynan dúnıege «Syǵan serenadasy» áni keledi.

Bul názik sezim men romantıkalyq shyǵarma – kirshiksiz, taza mahabbattyń jemisi boldy. Spektákl daryndy kompozıtordyń ánimen súıemeldendi. Poetıkalyq drama jelisindegi arpalys, sezim mashaqaty, Shámshiniń órminezdi ónegesi kórermenderdiń kóńilinen shyqty.

Búginde Sh.Qaldaıaqovtyń ómirsheń týyndysyn eńkeıgen qarttan, eńbektegen balaǵa deıin súıip tyńdaıdy. Án padıshasy ózi bolmasa da onyń shyǵarmalary qazaq halqymen máńgi jasaıdy.

Shymkent qalasy ákimdiginiń baspasóz qyzmeti