Shymkent qalasynda 172 nusqaýshy-baqylaýshy jáne 1207 ıntervúer úı-úıdi aralap, tikeleı halyq sanaǵyn ótkizýde. Sanaq personaly 1-30 qazan aralyǵynda sanıtarlyq talaptardy saqtaı otyryp, elektrondy planshetteri arqyly saýalnama júrgizedi. Olarǵa júktelgen jaýapkershilik te orasan. Saýalnama júrgizýshilerge qoldaý kórsetip, búkil el úshin mańyzdy sharaǵa jumyla, jaýapkershilikpen qaraý qajet. Bul týraly qala ákiminiń orynbasary Erǵalı Bilisbekov Shymkent qalasy ákimdiginiń «Instagram» paraqshasynda ótken tikeleı efır barysynda málimdedi. Erǵalı Daýletbekuly ulttyq halyq sanaǵynyń ótkizilý barysy jáne is-sharanyń mańyzyna toqtalyp, turǵyndar saýalyna jaýap berdi.

-Qazir búkil elimiz úshin mańyzdy kezeń ıaǵnı, Ulttyq halyq sanaǵy ótýde. Sanaq halyqtyń baryn baǵamdap, qalaı ómir súrip jatqanymyz ben ári qaraı damý joldaryn aıqyndaýǵa múmkindik beredi. Máselen, otbasy quramyn qaıta jazý arqyly bizge qansha perzenthana, qansha mektep, qansha aýrýhana salý kerektigine baǵyt-baǵdar alamyz. Demek, sanaq arqyly saraptama jasap, bolashaqqa naqty jospar qura alamyz,-dedi Erǵalı Bilisbekov.

Ulttyq halyq sanaǵynyń onlaın kezeńi 15-shi qazanǵa deıin ótedi. Azamattar arnaıy sanaq.gov.kz saıty arqyly sanaq paraqtaryn óz betinshe toltyra otyryp, sanaqqa qatysty barlyq suraqtarǵa jaýap berý múmkindigine ıe. Sonymen qatar, egov.kz elektrondy úkimet platformasy arqyly jáne mobıldi azamattar úshin «Aitu» mobıldi qosymshasy arqyly Ulttyq sanaqqa qatysý múmkindigi qarastyrylǵan.

Málimetke júginsek, búginde Shymkent qalasy boıynsha 253115 adam (23%) onlaın-sanaqtan ótken. Halyq sanaǵynyń jalpy qorytyndysy ekonomıkalyq, demografıalyq jáne áleýmettik ózgeristerdi kórsetip, qalanyń aldaǵy damý baǵytyn aıqyndaıdy.