Qala ákimi Murat Áıtenov Arǵynbekov pen Jibek joly kóshesinen bastap №2 kolektorǵa deıin júrgizilip otyrǵan kanalızasıalyq kolektor qurylysyn qadaǵalady.

Kolektordyń jalpy uzyndyǵy 13,1 shaqyrymdy quraıdy. 2020 jyldyń qazan aıynda merdiger mekeme «Saryaǵash-Aman» JSHS tarapynan 8 shaqyrym kolektor tartylyp, qurylys jumystarynyń 78 paıyzy aıaqtalǵan.

Atalǵan kanalızasıalyq kolektor qurylysy jyl sońyna deıin aıaqtalyp, paıdalanýǵa beriledi dep josparlanýda. Nátıjesinde, Saıram, Azat, Tassaı, Mıras, Nurtas, Ulaǵat, Shapaǵat, Soltústik-shyǵys jáne Samal-3 shaǵyn aýdandary kolektorǵa qosylady. Iaǵnı, 18 myń adam káriz júıesine qosylady.

Búginde qalada halyqty káriz júıesimen qamtý kórsetkishi 52,3% qurasa, jyl sońyna deıin qamtylýy 54%-ǵa ósedi. Qalanyń ońtústik pen soltústik bóligin kárizben qamtýdyń 2022-2025 jyldaryna arnalǵan josparyna sáıkes káriz tazalaý stansıasy men sorǵy stansıasynyń kolektorlary jáne eldi mekenderde ishki júıeler qurylysyn júrgizý josparlanyp otyr. Bul jumystar aıaqtalsa, 2025 jyly kárizben qamtý kórsetkishi 75 paıyzǵa jetedi.