Mańǵystaý oblysynda mas júrgizýshi gaz qubyryna soǵylyp, kóligi tolyǵymen janyp ketti, dep habarlady Lada saıty.

Resmı málimetke sáıkes, jol apaty Munaıly aýdanyna kiretin Basqudyq aýylynda bolǵan.

– ÝAZ Patriot júrgizýshisi mas kúıinde rólge otyryp, kóshede kele jatqanda gaz qubyryna soǵylǵan. Soqqy saldarynan órt shyǵyp, kólik tolyǵymen janyp ketti. Oqıǵa ornyna tótenshe jaǵdaılar men gaz qyzmetiniń mamandary kelip, órtti óshirdi. Zardap shekkender joq, – deıdi polıseıler.

Al kólik júrgizýshisi Ákimshilik quqyq buzýshylyq týraly kodekstiń 608-baby, 3-tarmaǵy (Júrgizýshiniń kólik quralyn alkogóldik, esirtkilik jáne (nemese) ýytqumarlyq masań kúıde basqarýy, ózge múlikti búldirýge ákep soqqan áreketter) boıynsha jaýapqa tartylǵan.

Osy bapta 20 táýlikke ákimshilik qamaqqa alý jáne 7 jylǵa kólik quralyn basqarý quqyǵynan aıyrý jazasy qarastyrylǵan.