Jalǵan ýáde jalpasynan túsip, qazaq teńgesi teńkıip qalsa da qazaq qoǵamy myńq etpedi, únsiz qaldy.Ermurat aǵam Bapısha aıtsaq: «Másimovtiń mińgirin kim túsindi?» dep júrgenimizde, Bas mınıstrdiń ýájin ózge túgili – ózi de túsinbegeni málim boldy. Qazaq úkimetiniń bilimsizdigi men biliksizdigi – álemniń aldynda Elimiz ben Elbasynyń abyroıyn aırandaı tógip, sútteı shashty.
Jarty jyldaı buryn Astanada ótken qazaqstandyq-horvattyq bıznes-forýmda qazaqtyń Premer-mınıstri Kárim Másimovtiń: «Bizde ózimizdiń bolǵymyz keletin eldi anyq kóre alamyz. Bizde osy qıyn ýaqyttarǵa degen damý josparymyz bar. Sizder osy kórinistiń bir bóligi bola alasyzdar. Bizdiń ózara paıdamyz úshin Qazaqstanǵa degen ınvestısıalar boıynsha sizderdiń usynystaryńyzdy estigim keledi… Men sizderge Qazaqstan bıznes úshin ashyq jáne bul Ortalyq Azıadaǵy bıznes júrgizýge eń yńǵaıly el degen aqparatty jetkizgim keledi…» – degenin synǵa alǵan qyraǵy jornalshy Ermurat aǵam: «Másimovtiń mińgiri sabaq bilmeıtin oqýshynyń «eki» almas úshin amaldaǵan aıtary ǵana boldy. Onyń «bizde ózimizdiń bolǵymyz keletin eldi anyq kóre alamyz…» deýinen-aq el úkimetin qandaı «suńǵyla» basqaryp otyrǵanyn sabaqtaı ber...» – dep, kóregendik tanytqan eken, jete túsinip, tereń boılaı almappyz?!.
Endi eldiń kúni amanynda teńgeni júgensiz jiberip, «1 AQSH dollary – 300 teńge bolsa da, qazaqtyń murtyn balta shappaıdy» deıtin «kósem» mınıstrler shyǵyp, Bas bankishi «bizdiń baǵamda sharýamyz joq» dep sasqan úırek artymen sýǵa súńgigende – álgi Bas mınıstr Kárim Másimov taǵy da tasada qaldy...
Bul basynyń baǵy bes batpan qandaı kúlsheli qudiret edi deseńshi?!.
El ishi ishinara tolqyndanǵanymen, jalpy jurt jaltań qaqty. Tek, Almatyda qoǵam belsendileri Ámirjan Qosanov, Gúljan Erǵalıeva, Rysbek Sársenbaıuly, Marjan Aspandıarova, Erlan Qalıevter bastama kóterip,«Baqylaýsyz devalvasıa -halyqtyń ómir súrý deńgeıiniń nasharlaýy: qoǵam men bıliktiń mindetteri» degen atpen narazylyq sharasyn ótkizbekshi boldy. Sharanyń aty Aqtóbe óńiriniń sý jańa ákimi Berdibek Saparbaevtyń jurtpen jabylyp «jazǵan» ǵylymı eńbeginiń shubalańqy taqyrybyna uqsaǵanymen, atalǵan azamattardyń kózdegeni - eldiń qamy, qazaqtyń múddesi ekendigi aqıqat. Degenmen, Almatynyń aqordalyqtar maqtap-baptaǵan «kreatıvti» ákimi Baýyrjan Baıbektiń kreatıvtiligi «sboı» berip, Ámirjan aǵama «ákireń» kórsetipti: «shara ótkiziletin alań bos emes» deı salypty. Bul bala da nemistiń elin kórgenimen, tártibin sińirmegenge uqsaıdy. Ne kerek, Ábaǵań da ońaı shaǵylatyn jańǵaq emes, ár alańdy surap, áli jalaýlatyp júrgen kórinedi. Qaıran shyndyq-aı, netken zilbatpan aýyr ediń deshi!..
Tórdegiler «táıt» dese de, Ermurat aǵamnyń myna sóziniń jany bar: «Osy arada 1995-97 jyldary Qazaqstan úkimetiniń premer-mınıstri Ákejan Qajygeldınniń AQSH, Japonıa, Anglıa, Germanıa jáne Túrkıa elderine jasaǵan resmı sapary eske túsedi. Máselen, Qajygeldınniń Túrkıa saparynda Qazaqstanda óndirilgen altyndy Ystambul bırjasyna shyǵarý máselesi sóz boldy. Sonda bizdiń premer monetarlyq altyn men taýarlyq altynǵa qatysty qarjylyq-ekonomıkalyq máseleni shemishkedeı shaqqan kezde, túrik eliniń sol kezdegi prezıdenti Súleımen Demerıeldiń aýzy ashylyp qalǵanyn óz kózimmen kórdim...»
Iá, eldiń óńine de, tórine de darynsyzdar qaptady. Úkimetin «qytaı tiliniń tilmashy» basqarǵan eldiń ál-aýqatynyń quldyraýyn kimnen kóreri.Qurmetti qalyń elim: únsizdik degenimiz – áste de minsizdik emes. Óz quqyńdy qorǵaı almasań, ólgenińshe ózgeniń tabanynda taptala beresiń!
Qajymuqan ǴABDOLLA
