Samarada 3-5 qazan kúnderi Reseı qazaqtarynyń Kishi quryltaıy ótedi. Ony «Reseı qazaqtarynyń federaldyq ulttyq-mádenı avtonomıasy» jalpyreseılik qoǵamdyq uıymy uıymdastyryp otyr. Bul týraly «Qamshy» portaly habarlaıdy. Quryltaıǵa Qazaqstannan jáne Reseıdiń túkpir-túkpirinen keletin qonaqtar qazannyń 1-inen bastap Samaraǵa kele bastaıdy dep josparlanyp otyr. Oǵan Dúnıejúzi qazaqtary qaýymdastyǵynan baratyn delegasıany QR Mádenıet jáne sport mınıstrliginiń Tilderdi damytý jáne saıası-qoǵamdyq jumys komıtetiniń qoldaýymen Tóraǵanyń birinshi orynbasary Talǵat Mamashev bastap barady. Quryltaı kezinde Dúnıejúzi qazaqtary qaýymdastyǵy men Reseı qazaqtarynyń federaldyq ulttyq-mádenı avtonomıasynyń baspasóz ortalyǵy jumys jasaıdy dep josparlanýda.
Jalpy Reseı qazaqtarynyń Kishi quryltaıy «Aq jol» qazaq ulttyq-mádenı avtonomıasy Samara aımaqtyq qoǵamdyq uıymynyń 10 jyldyq mereıtoıyna arnalǵan «Dostyqtyń shekarasy joq» dep atalatyn merekelik sharamen bastalady. Samara oblysy qazaqtarynyń materıaldyq emes mádenı murasynynyń kórsetiliminen: «Murager» kıiz úı- mýzeıindegi qazaq mádenıetiniń turmystyq jáne qoldanbaly óner buıymdarynyń kórmesi. Fotograf Lúdmıla Melnıchenkonyń «Samara qazaqtary» foto-kórmesi. Qazaqtyń ulttyq taǵamdarynan dám tatý kórmesi. Ulttyq belgiler men ulttyq kıimderdiń saýda kórmesi. Rejıser Sergeı Aleksandrovtyń «Naýryz» fılminiń kórsetilimi. Samara oblystyq «Qaırat» qazaq jastary qoǵamdyq uıymy qyzmetiniń tanystyrylymy bolady.
Odan keıin quryltaıdyń saltanatty ashylý rásimi jasalyp, «Aq jol 2003-2015» fılmi kórsetiledi. Aımaqtyq bılik organdary ókilderinen: Gýbernator ákimshiligi, oblystyq Dýma men Mádenıet mınıstrliginen jáne Qazaqstannan kelgen qonaqtardan Reseıdegi Qazaqstan Elshiligi, Dúnıejúzi qazaqtary qaýymdastyǵy, Batys Qazaqstan oblysy ákimdiginiń quttyqtaý sózderi aıtylady. Qazaqstandyq «Qyzdaraı» toby men ánshiler Erlan Rysqalı, Merýert Túsipbaeva, Tileýbek Qojanuly jáne Batys Qazaqstan oblystyq fılarmonıasy artıseriniń, sondaı-aq Samara qazaqtarynyń óner ujymdarynyń konserttik baǵdarlamasy usynylady.
Qazannyń 4-inde Reseı qazaqtarynyń ulttyq-mádenı avtonomıasynyń ashyq májilisi, QR Prezıdenti N.Nazarbaevtyń «Nurly jol – bolashaqqa bastar jol» Joldaýyna arnalǵan jáne «Zamanaýı Reseı qazaqtarynyń etnomádenı qozǵalysy: tájirıbe, mindetter, sabaqtar» atty dóńgelek ústel jıyndary men Neftegorsk aýdanyndaǵy Dmırtrıevka aýylynda qazaqstandyq artıserdiń konserti bolady. Kelesi kúni mundaı konsert Kınelsk aýdanyndaǵy Qazaq aýylynda jalǵasady.
Erlik Erjanuly
