Qazaqstan Respýblıkasynyń Prezıdenti Qasym-Jomart Toqaevtyń «Halyq únine qulaq asatyn memleket» tujyrymdasynyń aıasynda «Halyq qatysatyn búdjet» jobasy iske asyrý maqsatynda kez-kelgen qala turǵyny qala aýmaǵyn abattandyrý, damytý jáne jaqsartý boıynsha óz ıdeıasyn usyna alady.

2021 jyly aýlalardy abattandyrý jáne zamanaýı balalar oıyn alańshalaryn qurý maqsatynda qala búdjetinen 2,5 mlrd. teńge qaraldy. Qazirgi tańda qalamyzdaǵy kópqabatty 184 úıdiń aýlalaryn abattandyrý jumystary júrgizilýde. Onyń ishinde «Halyq qatysatyn búdjet» jobasynyń aıasynda turǵyndardyń usynysymen 101 úıdiń aýlalaryn abattandyrý jumystary júrgizilip, turǵyndardyń ıgiligine tapsyrylýda.

Budan bólek, buqaralyq sportty damytýǵa jaǵdaı jasaý, jastardy sportqa baýlý maqsatynda aǵymdaǵy jyly 115 sport alańshasyn salý qolǵa alynǵan. Onyń ishinde búdjet esebinen 101 sporttyq alańshaǵa 2 mlrd. teńge qaraldy, 14 alańsha demeýshilerdiń esebinen salynýda.

Qazirgi tańda Eńbekshi aýdanynda 15 sporttyq alańshanyń qurylysy qarqyndy túrde júrgizilýde. Jyl sońyna deıin 115 sporttyq alańsha qala turǵyndardyń ıgiligine tapsyrylady.

Paıdalanýǵa tapsyrǵaly turǵan alańsha turǵyndardyń usynysymen «Halyq qatysatyn búdjet» jobasy aıasynda Eńbekshi aýdany ákimi apparatynyń tapsyrysymen iske asyryldy.

Sonymen qatar, turǵyndarǵa jaıly orta qalyptastyrý maqsatynda «Build stroy» JSHS-i demeýshilik esebinen kógaldandyrý jumystary júrgizilip, aýyz sý burqaqtary ornatyldy jáne «Ǵajaıyp baq» atty turǵyndarǵa arnalyp demalys orny men baqsha quryldy. Baqshany qurýdaǵy maqsat balalarǵa gúl, aǵash, basqada kóshetter otyrǵyzyp, tálim-tárbıelik baǵytta eńbekke baýlý.

Qala ákimi M.D.Áıtenov 2022 jylǵa arnalǵan abattandyrý jumystaryn túrǵyndardyń usynysymen «Halyq qatysatyn búdjet» jobasynyń aıasynda jospar qurýdy tapsyrdy. Qazirgi tańda aýdan ákiminiń apparattary turǵyndardan usynystar qabyldap, jumys júrgizýde.

Shymkent qalasynyń Aqparattyq-kommýnıkasıalyq ortalyǵy