2021 jylǵy Ulttyq halyq sanaǵynyń aıaqtalýyna sanaýly kúnder qaldy. Aldyn-ala málimetter boıynsha, búginde Shymkentte jalpyulttyq sanaqtan 1 106 637 adam ótken. Demek, buǵan deıin tirkelgen halyq sanyna shaqqanda 100,6 paıyzdy quraıdy. Onyń ishinde 308 660 adam, ıaǵnı, 28,1 paıyzy onlaın-sanaqtan ótti. 797 977 azamat (72,6 paıyz) dástúrli sanaq barysynda tirkelip otyr. 

Bul týraly búgin aqparattyq-kommýnıkasıalyq ortalyǵynda Shymkent qalasy ákiminiń orynbasary Erǵalı Bilisbekov pen Ulttyq statısıka búrosynyń Shymkent qalasy boıynsha departament basshysy Syrym Mádıevtiń qatysýymen ótken brıfıńte málim boldy.

Baspasóz jıynynda 15 qazanda aıaqtalǵan onlaın-sanaq kóptegen ótinishterge baılanysty qaıta uzartylǵany aıtyldy. 21 qazannan bastap sanaq.gov.kz saıtynda onlaın saýalnama fýnksıasy qaıta qosylǵan. Sanaq saýaldaryna, sondaı-aq, E-Gov portaly nemese Aitu mobıldi qosymshasy arqyly jaýap berýge bolady. Onlaın ótý múmkindigi halyq sanaǵy aıaqtalǵanǵa deıin, ıaǵnı 30 qazanǵa deıin qoljetimdi bolady. Onlaın-sanaqtan ótkender sany boıynsha Qarataý aýdany jetekshi orynda. Aýdan halqynyń 38,4 % jańa formatta sanaqtan ótken.

- Shymkent qalasynyń turǵyndaryna osy mańyzdy is-sharada belsendilik tanytqandary úshin alǵys aıta otyryp, sanaqtan áli de ótpegen turǵyndardy sanaqqa barynsha qatysýǵa shaqyramyn. Úıge beıtanys adamdardy kirgizgińiz kelmese, ınternet jelisi arqyly tirkelýge bolady. El úshin aıryqsha mańyzdy ári tarıhı naýqanǵa qatysyp, qalamyzdyń damýyna eleýli jáne qundy úles qosa alasyzdar. Sanaq qorytyndysy ekonomıkalyq, demografıalyq jáne áleýmettik jaǵdaıymyzdy kórsetedi. Alynǵan derekter barlyq deńgeıdegi búdjetterdiń barynsha obektıvti qalyptasýyna negiz bolady. Máselen, turǵyn úı salý, bilim berý, densaýlyq saqtaý, áleýmettik salalardy damytýǵa jáne jumys oryndaryn qurýǵa kómektesedi, - dedi qala ákiminiń orynbasary Erǵalı Bilisbekov.

1-30 qazan aralyǵynda sanaq dástúrli ádispen júrgizilýde. Shymkent qalasynda 1400-den astam sanaq personaly tikeleı halyq sanaǵyn ótkizip, úı-úıdi aralaýda. Qarashanyń 1-7 aralyǵynda sanaq ótkizý ádistemesine sáıkes, baqylaý aralaý sharalary qarastyrylǵan. Bul kezeńde shamamen 10% respondent qamtylatyn bolady. Ulttyq halyq sanaǵy kezinde táýligine 24 saǵat boıy «1446» biryńǵaı call-ortalyǵy jumys isteýde. Aqparat ortalyǵyna qońyraý shalý tegin.

Shymkent qalasy ákimdiginiń baspasóz qyzmeti