El Táýelsizdiginiń 30 jyldyǵyna oraı «Elbasy Akademıasy» korporatıvtik qorynyń uıymdastyrýymen «Elbasy joly» ekspedısıasy Shymkentke keldi. Ekspedısıa quramynda Tuńǵysh Prezıdent N.Nazarbaevtyń «El Úmiti» bastamasy aıasynda júzege asyp jatqan jobalardyń úzdik, ári belsendi 10 qatysýshysy bar.
Ekspedısıa táýelsizdik jyldarynda elimizdiń jetken jetistigin keler urpaqqa dáriptep, QR Tuńǵysh Prezıdenti-Elbasy N.Nazarbaevtyń saıası ómir jolyn keńinen nasıhattaý maqsatynda jolǵa shyqqan.
— «Elbasy joly» ekspedısıasy Shamalǵan aýylynan bastaý aldy. Respýblıkanyń túkpir-túkpirinen kelgen 14-29 jas aralyǵyndaǵy belsendiler Qaskeleń men Almaty qalasyna baryp, Elbasy N.Nazarbaevtyń «Atameken» tarıhı-mádenı ortalyǵynan mańyzdy maǵlumattar aldy. Odan keıin elimizdiń rýhanı astanasy Túrkistan qalasyna kelip, «Elbasy medali» jobasynyń qatysýshylarymen kezdestik. Endi ekspedısıa Shymkenttegi 5 jasqa deıingi erekshe qajettiligi bar balalarǵa arnalǵan «Qamqorlyq» ońaltý ortalyǵyna kelip otyr, - deıdi «Elbasy Akademıasy» KQ-nyń baspasóz hatshysy Madına Sultanova.
N.Nazarbaev qorynyń «Qamqorlyq» ońaltý ortalyǵy Shymkentte 2020 jyly jeltoqsan aıynan bastap jumys istep keledi.
— Ortalyq aıyna 30 balaǵa kómek kórsete alady. Ashylǵan ýaqyttan beri 270 balaǵa kómek kórsetildi. Shalǵaı aýdandardan kelgen 221 bala táýliktik stasıonarda, 49 shymkenttik búldirshin kúndizgi stasıonarda em qabyldady. Emdelýshilerdiń 45 paıyzynyń qımyl-qozǵalysyn damytýǵa kómektessek, 35 paıyzynyń sóıleý qabileti damydy. Ortalyq zamanaýı qural-jabdyqtarmen qamtamasyz etilgen. Máselen, KSVP apparaty arqyly balanyń estý qabiletindegi aqaýdy erte anyqtaı alamyz. Sondaı-aq, munda Balalardyn serebraldy sal aýrýyna arnalǵan ońaltý jumystaryn erte kezeńnen bastaýǵa múmkindik bar. Onyń barlyǵy dárigerdiń nusqaýymen, arnaıy baǵdarlama boıynsha júzege asyrylady, - deıdi «Qamqorlyq» ońaltý ortalyǵynyń bólim meńgerýshisi Lázzat Sheralyqyzy.
Ekspedısıa músheleri ońaltý ortalyǵyndaǵy eń ozyq zamanaýı qurylǵylardy kórip, jeke jáne toptyq sabaq ótetin kabınettermen tanysty.
Aıta keteıik, ekspedısıanyń 25-31 qazan aralyǵyna josparlanǵan sapary Temirtaý men Nur-Sultan qalalarynda jalǵaspaq.
