Ol

Túsinbeı sógilgem men 
Keı uǵymdy. 
Ol -
Qatal bop kóringenmen, 
Meıirimdi!

Ómirin kópke sene, 
Súredi bar. 
Ol -
Sezimim joq dese de, 
Júregi bar!

Ar deıtin aq kesede, 
Jyry tunar. 
Ol -
Ókinip, " Qap! " dese de, 
Úmiti bar !

Taǵdyrǵa kektense de, 
Ermegi bop. 
Ol. . . 
Bilmeımin dep kelse de, 
Tergeni kóp.

Kúıgenim kóp dese de, 
Bıik qyran! 
Ol. . . 
Súıgenim joq dese de, 
Súıip turam!

Qalasań

Úndemesin dep qalasań. 
Mylqaý bop- aq óteıin! 
Kúnde kelsin dep qalasań, 
Syltaý kóp- aq, jeteıin!

Saǵynbasyn dep qalasań, 
Saǵynbaı -aq júrmekpin. 
Tabylmasyn dep qalasań, 
Joǵalamyn Qurmettim!

Kórmeıinshi dep qalasań, 
Saǵan jolap, barmaıyn. 
Sónbeıinshi dep qalasań, 
Sónbes sáýlem bar daıyn!

Umytsynshy dep qalasań, 
Umytamyn kóppenen. 
Jylytsynshy dep qalasań, 
Júregimnen ot berem!

İzdep kelshi dep qalasań, 
Alyp ushyp jetem bek. 
" Biz"dep kórshi dep qalasań, 
Saǵynysam ekeý bop!

Óleń órip ótem de ár kún, 
Jaqutyńa balasań. 
Baǵyń bolyp ketem bálkim, 
Baqytym aý, qalasań!

Sen ǵana emes

Sen ǵana emes, tańdarda, 
Taýqymet kórgen taǵdyrdan. 
Sen ǵana emes, jalǵanda,

Jubanysh izdep qańǵyrǵan!

Sen ǵana emes, alaýyn, 
Sóndirdi bir kez bári de. 
Sen ǵana emes, qalaýyn, 
Taba almaı júrgen áli de.

Sen ǵana emes, joq  shyny, 
Ótirik ózin súıdirgen. 
Sen ǵana emes, óksigi, 
Ózegin órtep kúıdirgen.

Sen ǵana emes, jerde joq, 
İzdegen birin jaqsynyń. 
Sen ǵana emes, pende bop, 
Quly bop ketken nápsiniń.

Sen ǵana emes, jylýdyń, 
Elinen erek shet qalǵan. 
Sen ǵana emes, sulýdyń, 
Qushaǵyn pana dep qalǵan.

Sen ǵana emes suraq kóp, 
Kúnási artyp, tógilgen. 
Sen ǵana emes, jylap kep, 
Ketetin jylap ómirden!

Sen úshin

Janymda tońamyn deseń, 
Qoryqpa, jylyta salam. 
Qasymda bolamyn deseń, 
Bárin de umyta salam.

Tózemin jasyryn synasań, 
Renjımin nesine saǵan? 
Keshir dep Asylym surasań, 
Qaıtadan keshire salam.

Eńseni bassa qaıǵy muń, 
Jamandy jaqsarta salam. 
Berse de álem baılyǵyn, 
Sen úshin bas tarta salam.

Suraǵym kep turǵanda da, 
Joq múlde syrym deı salam. 
Jylaǵym kep turǵanda da, 
Sen úshin kúlimdeı salam.

Sondaı em burynnan deseń, 
Ar jaǵyn qazbaı ótemin. 
Sharshadym jyryńnan deseń, 
Maqul dep, jazbaı ketemin.

Eshqaıda barmashy deseń, 
Barmaımyn, tyńdap ótemin. 
Men úshin arnashy deseń, 
Ózimdi qurban etemin.

Bárin de baıqadym deshi, 
Baryńda baǵalaımyn dep. 
Biraq ta aıta kórmeshi, 
Eshteńe qalamaımyn dep. . . 

Kim bilgen ?

Yntyq etken ómirge 
Keýdemdegi otpysyń? 
Kúrdelim, sheshilshi! 
Oǵan degen sezimimdi 
Jetkizýge joq kúshiń. 
Óleńim ,keshirshi !

Baǵasyna jete almasam, 
Kinálama kesh muny. 
Aýyrlaý ol maǵan. 
Elestete almaq emes 
Adamzattyń eshbiri. 
Eshkimge qonbaǵan!

Súıem dese meni bireý 
Kúıip, qalar kúl erin. 
Jalyndy qushpaq qur. 
Sol alapat qudiretti
Kip- kishkentaı júregim, 
Qalaısha ustap tur? !

Kómeıimnen úzilgende 
Saǵynyshtan jyr qulap.
Jubatar bolshy óziń. 
Sen jabyrqap qalǵanyńda Janaryńdy súrtip ap,  
Qorǵaıdy sol sezim.

Jap jaryq bop júregimmen 
Shaǵylysyp shyraıly, 
Tóbemde jatyr Aı. 
Biraq osy kúıim maǵan 
Sonshalyqty unaıdy, 
Qaıtemin apyr - aı!

Kelmeıtinin bile tura 
Júre berer tosyp aı. 
Jasyram syr kimnen? 
Ózińdi óziń tanymastaı
Súıý degen osylaı ...
Bolaryn kim bilgen?

Qaıtadan

Qushaǵyma jalǵyzdyqty jastasam, 
Tún ádemi aıtady án. 
Saǵynyshty tunshyqtyryp tastasam, 
Sen bosattyń qaıtadan.

Toǵyspaıdy jolym bóten senimen, 
Baıaǵyda- aq baıqaǵam. 
Jazbaımyn dep júrgenimde, jeliden,
Sen jazasyń qaıtadan.

Keıde tipti kezikkenge ókinip, 
Tózimimdi shaıqaǵam. 
Jylap qalsam jubanpastaı ókirip, 
Sen jubattyń qaıtadan.

Kóńilsizdeý ómirime, sen kúlseń, 
Oralardaı qaıta mán! 
Joǵalttym ǵoı, izdemeımin dep júrsem, 
Sen tabyldyń qaıtadan.

Ózimnen de, qatelik bar senen de, 
Ótti, deme qaıtaram. 
Endi óleńdi arnamaımyn degende, 
Jyrlanasyń qaıtadan.

Bile almadym endi bizder netermiz? 
Sen baryńda jaı tabam. 
Jyldar salyp esińde me ekeýmiz, 
Jolyǵyppyz qaıtadan.

Kóktem ótti, kóńilge endi kúz keldi, 
Endi qaıtip, jaıqalam? 
Bilip júrmin qosqan taǵdyr bizderdi, 
Bóletinin qaıtadan. . .

Mergúl Asylhanova