«Tassaı» ındýstrıaldy aımaǵyndaǵy «Mega SMART» JSHS MDF jyltyr plıta jáne jıhaz óndirisi 2016 jyly iske qosylǵan bolatyn.

Qala ákimi jyl saıyn ónimdilikti arttyrýǵa bet burǵan kásiporynnyń búgingi jaǵdaıymen tanysyp, jumys barysyna kýá boldy. Jalpy 1,2 mlrd teńge ınvestısıa tartylǵan. Búgingi tańda 157 adam jumys isteıdi. Daıyn ónimderdiń 60 %-y ishki naryqqa, 30 %-y eksportqa jóneltilýde.

«Mega Smart» zaýyty – elimizdegi balamasy joq biregeı óndiris orny. Ońtústik Koreıa tehnologıasymen jabdyqtalǵan kásiporyn 3D formatyndaǵy jyltyr taqtalardy da daıyndaıdy. Jylyna 72 myń MDF panelderin jáne 5000 dana jıhaz jıyntyǵyn shyǵarýda. Keńselerge jáne bilim berý mekemelerine asa qajetti jıhazdar.

Daıyn taýarǵa jumsalatyn shıkizattyń basym bóligi reseı jáne jergilikti ónim. Onyń qatarynda maqta talshyǵy da qoldanylady. «Mega Smarttyń» ónimderine Qazaqstanda suranys joǵary. Jyltyr taqtalar Ózbekstan, Qyrǵyzstan jáne Tájikstan elderine eksporttalýda. Aıta ketsek, óndiris ornyna «Bıznestiń jol kartasy – 2020» baǵdarlamasy aıasynda qoldaý kórsetilgen.