Shymkent qalasy memlekettik eńbek ınspeksıasy basqarmasynyń basshysy B.Qaljanov 2021 jyldyń 9 aıynda atqarylǵan jumystardy baıandady. Basqarma basshysy eńbek zańnamasynyń saqtalýyn memlekettik baqylaý, jazataıym jaǵdaılar, ujymdyq shart jasasý, aqparattyq-nasıhattyq jáne taǵy basqa baǵyttarda júzege asqan jumystardy aıtyp ótti.

9 aıda ár túrli menshik nysanyndaǵy kásiporyndar men uıymdardan, jeke tulǵalardyń 831 aryz-shaǵymdar men ótinishteri zańǵa sáıkes qaralyp, basqarma tarapynan tıisti jaýaptar berildi.
Basqarma basshysynyń aıtýynsha, aryz-shaǵymdar árdaıym zerdelenip otyrady. Esepti kezeńde jumyspen qamtý jáne áleýmettik qorǵaý, kólik jáne logıstıka, qarjy naryǵy jáne basqa salalarda aryz-shaǵymdar kóbeıgen.

Memlekettik eńbek ınspektorlarymen 172 tekserý júrgizilip, 254 zańbuzýshylyq anyqtaldy. Onyń ishinde, eńbek qatynastary boıynsha 191, eńbek qaýipsizdigi jáne eńbekti qorǵaý boıynsha 57, jumyspen qamtý boıynsha 6 zań buzýshylyq tirkelgen. Anyqtalǵan buzýshylyqtardyń negizinde 102 nusqama berilgen. Tekserý nátıjelerimen 7,9 mln teńge kóleminde aıyppul salynyp, 5,8 mln teńge aıyppul óndirilgen.

Sonymen qatar, basqarmanyń memlekettik eńbek ınspektorlary tarapynan jyl basynan beri 56 kásiporyndaǵy 2121 jumyskerdiń 230,5 mln teńge kólemindegi jalaqy qaryzdary ótelip, 2121 jumyskerdiń áleýmettik quqyqtary qorǵaldy.