Shymkent qalasy ákiminiń orynbasary Erǵalı Bilisbekov búgin qaladaǵy tozyǵy jetken birqatar úılerdi aralap, turǵyndardyń jaı-kúıimen tanysty.

Búginde qalanyń tehnıkalyq zertteý qorytyndysy negizinde 107 kóppáterli turǵyn úı tozyǵy jetip, buzýǵa usynylǵan. Ótken ǵasyrdyń 30-shy jyldary soǵylǵan úıler búginde apatty jaǵdaı aldynda.

Ákim orynbasary eń aldymen 1-Mamyr kóshesi boıynda ornalasqan 14 A,B, 16 A jáne 20-shy úılerde boldy. Tozyǵy jetken úılerdiń shatyry tozyp, jarylǵan qabyrǵasy qıraǵaly tur. Aǵash baspaldaqtary da ábden kónergen. Esesine aralarynda komýnaldyq júıeleri de shirip, isten shyǵýy jıi kezdesedi.

Turǵyndardyń qaýipsizdigi úshin eskirgen úılerdi súrip, qaıta salý qajettigi týyndaǵan. E.Bilisbekov aralaý barysynda jaýapty sala mamandaryna ýaqyt ozdyrmaı, shuǵyl áreketke kóshýdi tapsyrdy.

Tozyǵy jetken úılerdi buzý baǵdarlamasy – bul turǵyndarǵa eshbir shyǵynsyz óz úılerin jańartý múmkindigi. Jyljymaıtyn múlik naryǵynda baǵasy tómen eskirgen turǵyn úıler súrilip, turǵyndary jańadan boı kótergen úılerge qaıta qonystanýǵa múmkindigi bar. Eń bastysy turǵyndardyń talap-ýájderin eskere otyryp, olardyń kelisimderimen apatty turǵyn úılerden kóshirip alýymyz qajet. Sodan soń ǵana tozyǵy jetken úılerdi súrip, ornyna jańa úılerdiń qurylysyn bastaımyz. Turǵyndar ýaqytsha baspanamen qamtylyp, úıleri bitken soń qaıta qonystana alady nemese teń páter qarastyrylady. Nátıjesinde shahardyń sáýletine de sán keledi,-dedi Erǵalı Dáýletbekuly.

Qazirgi tańda, bul iske ınvestorlardy tartý qarastyrylyp otyr. Pılottyq joba retinde aldymen Gagarın kóshesi №112 janyndaǵy ǵımarat, 1 mamyr kóshesi №29 úı, Sh. Qaldaıaqov kóshesi №35 úıler boıynsha daıyndyq jumystary atqarylýda.

Úılerdiń birqataryna ázirge modernızasıalaý jumystary da jetkilikti. Máselen, Volodarskogo 7 úıdiń turǵyndary jańǵyrtý jumystarynyń júrgizilip, kem-ketigi túzelýine kelisip otyr. Kezdesý barysynda turǵyndar qala ákiminiń orynbasaryna birqatar ótinishterin jetkizdi.