Eńbek jáne halyqty áleýmettik qorǵaý mınıstrliginiń "Eńbek resýrstaryn damytý ortalyǵy" karantınniń bala týýǵa áseri týraly elaralyq zertteý nátıjesin jarıalap, ulttyq statısıkalyq derekterdi taldaý, zertteý júrgizilgen elderdiń kópshiliginde karantın týýǵa teris áser etkenin kórsetkenin málim etti.
Mınıstrlik taratqan habarlamada zertteý barysynda sarapshylar 2020 jylǵy qarashadan bastap 2021 jyldyń sońǵy aıyna deıingi kezeńde ártúrli elderdegi týý týraly naqty derekter ótken 4-5 jyldaǵy týý qarqyny negizinde eseptelgeni, pandemıa men basqa ózgerister bolmasa, týý ınersıasy boıynsha júretin trend mánderimen salystyrylǵany aıtylady.
"Osylaısha Portýgalıada, Rýmynıada jáne Chılıde týý deńgeıi sáıkesinshe 9%-ǵa, 12%-ǵa jáne 19%-ǵa tómen bolǵany baıqaldy. AQSH pen Shveısarıada mundaı tómendeý 4-5%-dy qurady. Belgıa, Italıa, Slovenıa, Ispanıa, Ulybrıtanıa, Japonıa, Sıngapýr, Fransıa elderinde týý kórsetkishi 1,3-2,5%-ǵa tómendedi (trendpen salystyrǵanda).
Alaıda keıbir elderde karantın jáne onymen baılanysty sharalar balanyń dúnıege kelýine oń áser etti. Máselen Taıvanda, Nıderlandta, Koreıa Respýblıkasynda naqty týý kórsetkishi trendtik mánnen 3,1-5,6%-ǵa asyp tústi" delingen habarlamada.
Eńbek resýrstaryn damytý ortalyǵy Boljamdaý departamenti dırektorynyń orynbasary Qaıyrbek Aıashevtyń sózinshe, Nıderland, Ońtústik Koreıa jáne Taıvan sekildi elderde pandemıa kezinde el úkimetiniń daǵdarysqa qarsy sátti sharalarynyń arqasynda jumyssyzdyq deńgeıi tómendep, turǵyndardyń bılikke senimi artqan. Al bul "bebı-býmǵa yqpal etýi múmkin" dep tujyrymdaıdy ol.
Zertteýdiń Qazaqstandaǵy týý jaǵdaıyna baılanysty tusynda, týý kórsetkishiniń joǵarylaýy úkimettiń kópbalaly otbasylardy qoldaý sharalarymen baılanystyrylǵan.
Qazaqstanda týýdyń kúrt ósýi 2020 jyldyń III toqsanynan bastap baıqalady – týǵandar sany 116,7 myńdy qurady, bul – 2019 jylǵy III toqsanǵa qaraǵanda 8,4%-ǵa artyq. 2020 jylǵy IV toqsanda ósim 2019 jylǵy IV toqsanǵa qaraǵanda 9,5%-dy qurady. 2021 jylǵy I-II toqsandarda ósim 2020 jylǵy tıisti toqsandarǵa qaraǵanda 8,4 jáne 10,7%-dy qurady.
"Bizde karantın bebı-býmǵa ákeldi degen pikir keń taralǵan, alaıda, 2020 jylǵy III jáne IV toqsanynyń kóp bóliginde bul tujyrym teris ekenin ańǵarýǵa bolady. 2020 jylǵy III toqsanda týǵan balalar 2019 jyldyń IV toqsanynda, tipti Ýhan turǵyndary jańa juqpaly koronavırýs týraly habardar bolmaǵan kezde boıǵa bitken. Sondaı-aq, Qazaqstanda 2020 jylǵy IV toqsanda týǵan balalardyń az ǵana bóligi karantın kezinde boıǵa bitýi yqtımal, óıtkeni alǵashqy karantındik shekteýler 2020 jyldyń naýryz aıynyń ortasynda-aıaǵynda engizildi" dep túsindirdi sarapshy.
Eńbek resýrstaryn damytý ortalyǵy Qazaqstanda 2020 jyly bala týý kórsetkishiniń ósýiniń neǵurlym yqtımal sebebi retinde, 2020 jylǵy 1 qańtardan bastap tabysyna qaramastan, tórt jáne odan da kóp birge turatyn kámeletke tolmaǵan balalary nemese 23 jasqa deıingi kúndizgi oqý bóliminiń stýdentteri bar otbasylar úshin aı saıynǵy jańa járdemaqynyń engizilýin ataýda. Bul rette járdemaqynyń engizilýi týraly 2019 jyldyń qazan-jeltoqsanynda jarıalandy.
"2020 jyly Qazaqstanda 426 824 bala dúnıege keldi, bul 2019 jylmen salystyrǵanda 24 514 balaǵa kóp. Bala týý ósiminiń basym bóligi (65%) kezektilik boıynsha tórtinshi balanyń týýy esebinen qamtamasyz etildi. Bala týýdyń 24%-ǵa ósýi balalardyń týý kezegi boıynsha besinshi esebinen qamtamasyz etildi. Osylaısha, Qazaqstanda kópbalaly otbasylar boıynsha jańa aı saıynǵy járdemaqy, negizinen kezek boıynsha 4 jáne 5 balanyń týylýyn yntalandyrady" dep túıindedi Qaıyrbek Aıashev.
Sońǵy qoljetimdi málimetterge sáıkes, 2021 jyldyń qańtar-tamyzynda Qazaqstanda 296,5 myń bala dúnıege keldi, bul ótken jyldyń sáıkes kezeńimen salystyrǵanda 8,4%-ǵa kóp.
Kópbalaly otbasylarǵa taǵaıyndalatyn járdemaqy mólsheri tómendegideı:
- 4 balaǵa – 42 496 teńge;
- 5 balaǵa – 53 127 teńge;
- 6 balaǵa – 63 757 teńge;
- 7 balaǵa – 74 388 teńge;
- 8 balaǵa – 88 896 teńge;
- 9 balaǵa – 100 008 teńge;
- 10 balaǵa – 111 120 teńge;
- 11 balaǵa – 122 232 teńge;
- 12 balaǵa – 133 344 teńge;
- 13 balaǵa – 144 456 teńge;
- 14 balaǵa – 155 568 teńge;
- 15 balaǵa – 166 680 teńge;
- 16 balaǵa – 177 792 teńge;
Pikir qaldyrý