Qazaqstan-Polsha bıznes-forýmy aıasynda shymkenttik delegattardy bastap barǵan qala ákiminiń orynbasary Aıbek Sáttibaev QR Syrtqy ister mınıstrliginiń Investısıa komıteti tóraǵasynyń orynbasary Larısa Jumaǵalıevamen birge Poznan qalasyndaǵy qoqys óńdeý zaýytynyń jumysymen tanysty.

Kásiporyn – 1927 jyldan beri Ortalyq Eýropadaǵy qoqys óńdeıtin zaýyttardyń biregeıi. Zaýyttyń ereksheligi, qoqysty jaǵý arqyly alynǵan kúl tyńaıtqysh, aıaqjol plıtkalary men káriz qubyrlaryn óndirý úshin paıdalanylady.

Sonymen qatar, A.Sáttibaev Poznan oblysy ákiminiń orynbasary Iasek Bogýslavskıımen kezdesý ótkizip, kásipker ınvestorlarmen ózara kelisim jasaldy. Aıbek Berikuly Shymkenttiń joǵary áleýetin tanystyra kele polshalyq kásipkerlerdi qalaǵa ınvestısıalyq jobalardy júzege asyrýǵa shaqyrdy.

Qalada búginde turmystyq qaldyqty suryptap, qaıta óńdeý baǵytynda «GrınLaın» JSHS jumys isteýde. Megapolısti abattandyrý men kórkeıtýdiń aldaǵy bes jylǵy josparyna sáıkes, qoqysty bólek jınaý jáne qaıta óńdeýge basa nazar aýdarylýda.
Osy maqsatta qala ákimdigi sheteldik ınvestorlardy tartý baǵytynda jumystar júrgizýde.