"Bloomberg" mıllıarderler ındeksine sáıkes, Tesla kompanıasynyń bas atqarýshy dırektory Ilon Masktyń baılyǵy 335 mıllıard dollarǵa jetti.

Salystyrý úshin aıtsaq, onyń dáýleti "Berkshire Hathaway" kompanıasynyń bas dırektory Ýorren Baffettiń baılyǵynyń úsh esesinen kóp, al, Bıll Geıtstiń dáýletiniń úsh esesine taıaý.

Osylaısha Masktyń ındekstegi baılyǵy onyń týǵan otany Ońtústik Afrıkanyń jalpy ishki óniminen asyp ketti. Dúnıejúzilik banktiń málimetteri boıynsha, eldiń JİÓ 301,9 mıllıard dollardy quraıdy. 

Al, Masktyń baılyǵy Qazaqstan JİÓ-niń  (169,8 mlrd AQSH dollary, 2020) eki esesindeı.

"Bloomberg" aqparaty kórsetkendeı, Masktyń taza baılyǵy bıyl 165 mıllıard dollarǵa ósken.

"Onyń dúısenbi kúngi tabystary Tesla aksıalary baǵasynyń 8,5%-ǵa ósýine baılanysty boldy" dep habarlady "Bloomberg". Mýltımıllıarder kompanıanyń shamamen 22,4% aksıasyna ıelik etedi.