Mıllıarder, Tesla kompanıasynyń bas atqarýshy dırektory Ilon Masktyń Twitter akkaýntynda biraz shytyrman oqıǵalar boldy.

2018 jyly Mask "Tesla-ny jekemenshikke alýdy qarastyryp jatyrmyn" degen tvıtinen keıin oǵan AQSH-tyń baǵaly qaǵazdar jáne bırjalar jónindegi komısıasy aıyp taǵyp, 20 mıllıon dollar aıyppul salǵan bolatyn.

2020 jyldyń sáýirindegi lokdaýn kezinde, Mask Twitter-de "DÁL QAZİR AMERIKANY ERKİN JİBER" dep jazyp, taǵy da daý týdyrǵan.

Kelesi aıynda Mask "Men barlyq derlik fızıkalyq menshikterimdi satamyn. Eshqandaı úı bolmaıdy" degen.

Endi 62 mıllıon jazylýshysy bar Mask taǵy da bir qyzyqty tvıt jarıalady.

Tvıt aǵylshyn tilinde "adamzat" degen sózden bastalǵan. Odan keıin qytaı tilindegi ejelgi óleń joldary ketedi.

Óleńdi bizdiń zamanymyzdyń 220-280 jyldar aralyǵyndaǵy Qytaıdyń Úsh memleketke bólingen kezeńinde ómir súrgen aqyn Sao Chjı jazǵan. Derekterge sáıkes, Sao Chjı bul sózderdi aǵasymen aradaǵy daýdy sheshý úshin daýystap aıtqan.

Derekter boıynsha, ımperator Sao Pı inisi Sao Chjıdiń bılikti qulatpaq nıeti bar dep kúdiktenip, onyń adaldyǵyn anyqtaý úshin aqyndy shaqyrady. Imperator Sao Chjı aqynnyń kinásizdigine kóz jetkizý úshin odan jeti qadam attamaı turyp óleń jazýdy talap etedi.

"Jeti qadam tórt tarmaq" degen óleń ımperatordyń osy synaǵynan týyndaǵan. Sodan keıin ımperator emosıasyn jeńip, inisine kúdigi seıilgen-di.

Óleńniń tórt tarmaqty nusqasynyń (Mask bólisken) aýdarmasy kelesideı:

"Burshaq sabaǵynyń jalynynda burshaqtar qýyryldy,

Qazannyń ishinde burshaqtar) ashýlandy:

"Biz bir tamyrda óstik -

Bizdi otta pisirýge nege asyǵasyń?".

(Humankind

煮豆燃豆萁

豆在釜中泣

本是同根生

相煎何太急)

Bul qytaı ádebı shyǵarmasy ádette baýyrlastar arasyndaǵy qarym-qatynasty retteıtin jáne usaq kelispeýshilikterge jaýap retinde "bir-birine zıan keltirý" degen ıdeıaǵa qarsy turatyn metafora retinde túsindiriledi.

Masktyń tvıti Qytaı men AQSH áleýmettik jelisinde qyzý talqyǵa tústi. Óleń joldaryna taldaý jasaǵan, onyń kimge baǵyttalǵanyn túsindirgen ár túrli teorıalar paıda boldy. 

Áleýmettik jeli qoldanýshylary men álemdik BAQ Mask aıtyp otyrǵan "metaforalyq aǵaıyndylar kim bolýy múmkin?", "búkil adamzat?", "klımattyń ózgerýine qarsy kúres pe?", "Mask pen ǵaryshqa qumar mıllıarder Djeff Bezos pe?", "Qytaı men Amerıka Qurama Shtattary ma?" degen suraqtar qoıǵan. 

"Bizdiń batystyq dostarymyz úshin. Bul Úsh Patshalyq romansyndaǵy óleń. Biz (osy óleń joldary arqyly) bir-birimizben soǵyspaý kerektigin beıneleımiz" dep jazady OKEX bas dırektory Djeı Hao Twitter-de. Ol Masktyń tvıti Shyǵys pen Batysty meńzegenin,  qaqtyǵysty boldyrmaý kerek ekenin aıtty dep senedi.

"Ol Taıvan máselesin aıtyp jatyr. Onyń kózqarasy bilinýde" delingen Masktyń Weibo jazbasynyń astyndaǵy tanymal pikirde.

"Munyń sebebi demokrattar baılarǵa salyq salǵysy keledi, onyń ishinde Masktyń 50 mıllıard AQSH dollary jáne Bezostyń 44 mıllıard dollary bar" dep jazady taǵy biri.

Masktyń poetıkalyq tvıtteriniń astyndaǵy keıbir túsiniktemelerde  "Shiba Inu jáne Dogecoin krıptovalútalaryna silteme jasalýy múmkin" ekendigi aıtylǵan.

Alǵashqy kezde Mask Dogecoin krıptovalútasyn qoldap, ol júzdegen ese qymbattaǵan. Keıinirek oǵan básekeles retinde Shiba Inu krıptovalútasy shyǵyp, onyń da baǵasy kórnekti kóterildi. Tipti jaqynda Shiba Inu-dyń naryqtyq quny Dogecoin-nan asyp tústi. "Bul tıisti monetalardy jaqtaýshylar arasynda shıelenis týdyrdy" dep habarlady Fortune.

Al, Qytaıdyń "Sınhýa" memlekettik agenttigine qarasty "Reference News" basylymy Masktyń jazbasyna basqasha taldaý jasaıdy. Basylym tvıtti Birikken Ulttar Uıymy Dúnıejúzilik Azyq-túlik baǵdarlamasynyń atqarýshy dırektorymen qaıyrymdylyq týraly Masktyń qyzý pikir almasýymen baılanystyrady.

Tesla kompanıasy ejelgi qytaı óleńi týraly tvıtke túsinikteme berý suraýyna jaýap bermedi.