Almaty qalasy kásipkerler palatasy dırektorynyń orynbasary Saltanat Lesbaeva "kók" mártebesi bar qazaqstandyqtar saýda ortalyqtaryna jumys kúnderi de kire almaýy múmkin ekenin  málimdedi.

– Búgingi kúni bas sanıtarlyq dárigerdiń qaýlysy boıynsha "jasyl" mártebesi bar tulǵalardy ǵana nysandarǵa kirgizý kózdelip otyr. Jaqynda VAK otyrysynda bul tájirıbeni jumys kúnderi de saýda-oıyn saýyq ortalyǵynyń jumys tártibine engizý usynyldy. Iaǵnı, búgingi tańda saýda oıyn-saýyq ortalyqtaryna tek "jasyl" mártebesi bar tulǵalar ǵana bara alýy úshin atalǵan másele talqylanýda, – dedi Saltanat Lesbaeva brıfıń barysynda.

Onyń aıtýynsha. "Atameken" UKP máseleni talqylaýǵa belsendi qatysady. 

– SOO-da kóptegen kásipkerler jumys isteıdi. Bul obektilerde aınalymy, tabysy tómendeýi múmkin basqa da qyzmet túrleri ornalasqan. Sondyqtan bul másele qazir belsendi talqylanyp jatyr jáne pysyqtalýda, – dep naqtylady ol.

Lesbaeva jaqynda "Atameken" UKP Basqarma tóraǵasynyń orynbasary Oljas Ordabaevtyń tóraǵalyǵymen múddeli bıznes sýbektilerin tarta otyryp, osy usynysty talqylaý boıynsha jumys keńesi ótkenin atap ótti.

– Endi barlyq shyǵyndardy esepteý kerek, olar óz jumystaryn qalaı uıymdastyrady, bul kelýshiler trafıginiń tómendeýine áser ete me, joq pa. Osy máselelerdiń barlyǵyn talqylaý qajet, sodan keıin Densaýlyq saqtaý mınıstrligindegi áriptestermen birge bul másele pysyqtalatyn bolady, – dedi Lesbaeva.

Bas sanıtar dárigerdiń qaýlysyna sáıkes, senbi-jeksenbi kúnderi saýda ortalyqtaryna “jasyl" mártebesi bar adamdar ǵana kire alady. "Jasyl" mártebe vaksına saldyrǵandarǵa beriledi. "Kók" mártebe koronavırýspen aýyrmaǵandarǵa tıesili.