Petropavldaǵy kómir qoımalarynda kómir az. Al deldaldar jaǵdaıdy paıdalanyp, kómirdi qymbatqa satyp jatyr, dep habarlady Almaty.tv.   

Jergilikti turǵyndardyń sózinshe, deldaldar kómir tonnasyn 22-25 myń teńgege satady. 

– Aýyldaǵy adamdar kómirdi 22-25 myń teńge aralyǵynda alyp júr. Sebebi basqa tańdaý joq. Qalaǵa da qara otyn jetpeı otyr. Kishkentaı balalar, áıelder qońyraý shalyp, tońyp otyrmyz dep jylaıdy. Jaǵatyn kómirimiz joq, otyn biteıin dep jatyr, úıdi jylyta almaı otyrmyz, –  deıdi oblys turǵyny Oleg Ostrovnoı.

2 aı boıy kómir ala almaǵan turǵyndar, júk kólikteri qoımadaǵy qara otynnyń teń jartysyn tıep áketetinin jáne ózderi kómirsiz qalatynyn aıtady. 

– Aýdandardan jurt kóptep kelip jatyr. Shalǵaıdaǵy oryndardan eshkim almaıdy, osynda keledi. Sol úshin kóbeıip jatyr. Kelgenderdiń biri 40 tonna áketedi, biri 100 tonna áketedi. Endigi kelgenderge kisi basyna 5-6 tonnadan ǵana beretin bolamyz. Sonda bárine jetýi múmkin, – dedi kómir satatyn orynnyń qyzmetkeri Murathan Turmuhambetov.