Búgin otandyq bilim berý isiniń korıfeıi, Qazaq KSR bilim berý mınıstri bolǵan Qajahmet Balahmetov ómirden ótti. Qaraly habardy bilim jáne ǵylym mınıstri Asqat Aımaǵambetov facebook paraqshasynda jetkizdi.
– Qajahmet Balahmetuly elimizdiń bilim berý salasyn damytýǵa baǵa jetpes úles qosqan adam. Bul salany 13 jyldan astam basqarǵan ol, balalar men jastardy oqytý máselesine erekshe nazar aýdaratyn.
Sońǵy ret Qajahmet Balahmetovpen bıyl jazda 95 jas mereıtoıymen quttyqtap barǵanymda kezdesip edik. Ol únemi bilim berý isindegi jańalyqtardy qadaǵalap, óz tájirıbesimen bólisip otyratyn. Qajahmet Balahmetulynyń týǵan-týystary men jaqyndaryna qaıǵylaryna ortaqtasyp, kóńil aıtamyn, – dedi Aımaǵambetov.
Qajahmet Balahmetov 1926 jyly 26 maýsymda Aqmola oblysynda týǵan. Qazaq KSR aǵartý mınıstri qyzmetin 1974-1987 jyldary atqarǵan.
Balahmetov mınıstr bolǵan jyldary mektepterdiń materıaldyq-tehnıkalyq bazasyn nyǵaıtý boıynsha túbegeıli sheshimder qabyldaǵan. Mektepter men balabaqshalar, oqý oryndarynyń qurylysyn qarqyndy júrgizgen.
Onyń bilim berý máselelerine arnalǵan 70-ten asa eńbegi jaryq kórgen.
Pikir qaldyrý