Búgin Májiliste Palata Tóraǵasy Nurlan Nyǵmatýlın Polsha Respýblıkasynyń Senat Marshaly  Tomash Grodzkıımen kezdesip, eki el arasyndaǵy yntymaqtastyqty damytýdyń  ózekti máseleleri boıynsha pikir almasty.

Palata Spıkeri kelesi jyly Qazaqstan men Polsha arasyndaǵy dıplomatıalyq qatynastardyń ornaǵanyna 30 jyl tolatynyn atap ótip, osy jyldar ishinde elder arasynda senimdi saıası dıalog ornaǵanyn, saýda-ekonomıkalyq jáne mádenı-gýmanıtarlyq yqpaldastyqtyń belsendi damyǵanyn jetkizdi.

Kezdesý barysynda Májilis Tóraǵasy Qazaqstannyń Tuńǵysh Prezıdenti Nursultan Ábishuly Nazarbaevtyń Qazaqstan-Polsha yntymaqtastyǵyn nyǵaıtýǵa qosqan úlesi erekshe ekenin, osy jolda Memleket Basshysy Qasym-Jomart Toqaevtyń elder arasyndaǵy jan-jaqty áriptestikti damytýǵa zor mán beretinin aıtty.

Nurlan Nyǵmatýlınniń aıtýynsha, mártebeli meımannyń elimizge sapary parlamentaralyq dıalogty odan ári nyǵaıtýǵa jáne elderimiz arasyndaǵy ekijaqty ózara is-qımyldy keńeıtýge eleýli serpin berdi.

Óz kezeginde, Tomash Grodzkıı  Qazaqstanmen ózara is-qımyldy damytý, halyqtar arasyndaǵy qatynastar dostyq pen ózara kómek negizinde qurylatynyn atap ótip, Qazaqstanda túrli ult ókilderiniń dostyq pen kelisimde ómir súrip jatqanyna qyzyǵýshylyq tanytty.

Sonymen qatar, taraptar parlamentaralyq dıalogty arttyrýǵa erekshe nazar aýdardy.

Otyrys barysynda Nurlan Nyǵmatýlın Memleket Basshysynyń bastamasymen elimizde júrgizilip jatqan saıası júıeni reformalaý, azamattyq qoǵamdy damytý jónindegi jumystarǵa nazar aýdardy. Májilis Tóraǵasy sondaı-aq, Qazaqstan Parlamenti eldi saıası jańǵyrtý úshin qajetti zańnamalyq bazany qamtamasyz ete otyryp, bul proseske belsendi túrde tartylǵanyn atap ótti.

Májilis Tóraǵasy parlamentaralyq baılanystardy nyǵaıtýdyń mańyzdylyǵy týraly aıta kelip, polák áriptesine qazaqstandyq jáne polák parlamentshileriniń yntymaqtastyq jónindegi toptar, sondaı-aq zańnamalyq tájirıbemen almasý úshin tıisti komıtetter deńgeıindegi ózara baılanysty kúsheıtýdi usyndy.

Óz kezeginde, Senat Marshaly Tomash Grodzkıı polák senatorlarynyń Qazaqstanmen barlyq salada yntymaqtastyqty damytýǵa qajetti qoldaý kórsetýge daıyn ekendigin aıtty.

Kezdesý sońynda Májilis Tóraǵasy Nurlan Nyǵmatýlın polák áriptesterin jáne Polsha halqyn 11 qarasha kúni atap ótetin ulttyq mereke –Polsha Táýelsizdigi kúnimen quttyqtady.

Nurlan Nyǵmatýlın men Tomash Grodzkıı qazaqstandyq jáne polshalyq Parlament ókilderi arasyndaǵy dıalogty jandandyrý eki el úshin de tıimdi bolatynyna senim bildirdi.

Májilistiń baspasóz qyzmeti