Búgin «Shańyraq» baǵdarlamasy aıasynda Turan-2 shaǵynaýdanynda ornalasqan turǵyn úılerdegi páterlerge tikeleı satylym bastaldy. Otbasy banki jarıalaǵan aqparattarǵa sáıkes, satylymdaǵy taza árleýdegi páterdiń 1 sharshy metriniń baǵasy 200 000 teńgeni qurap otyr. Jeńildetilgen paıyzdyq kórsetkishpen satylymdaǵy jalpy páter sany – 305. Onyń ishinde, 1 bólmeli páterler sany – 136, 2 bólmeli – 147, 3 bólmeli – 22.

Atalǵan turǵyn úılerdegi páter quny jobamen: 1 bólmeli páter 8 508 000 teńgege deıin; 2 bólmeli páter 12 438 000 teńgege deıin jáne 3 bólmeli páter 15 548 000 teńgege deıin.
⠀
Nesıelik baspanaǵa qol jetkizýdi kózdegen azamattardan ótinishter Otbasy banktiń «otbasybank.kz» ınternet-resýrsy arqyly osy jyldyń 08-18 qarasha aralyǵynda qabyldanady.
⠀
Alǵashqy jarna páter qunynyń 10 % tólený arqyly, nesıe jyldyq 5% - ben beriledi. Nesıe merzimi – 20 jylǵa deıin. Maksımaldy nesıe somasy – 15 mln teńge.

Aıta ketý kerek, atalǵan tikeleı satylym boıynsha turǵyn úı kezeginde turǵan Otbasy banktiń salymshylary ǵana ótinim tastaı alady. Jańa páterdiń ıegeri atanýdyń múmkindigin paıdalanyp, ótinim joldańyz.