Búgin Aıajan Edilovanyń ólimine qatysty basty sot talqylaýy bastaldy. Sot Almatynyń asa aýyr qylmystyq ister jónindegi mamandandyrylǵan aýdanaralyq sotynda jabyq rejımde ótedi.

– İsti qaraý saǵat 10-ǵa josparlanǵan. İs shamamen 30 tomnan turady, 30-ǵa jýyq saraptama jasaldy, –  dedi Aıajan otbasynyń ókili Qadyrjan Ǵalymjanuly.

Advokat iske qatysty ózge málimet bermegen.

İs sotqa 20 qazanda túsken. Aldyn ala tyńdaýda sottalýshy alqabıler sotynan bas tartty. Endi tártipke saı úkimdi sýdıa shyǵarady. 

Eske salsaq, 2021 jyldyń 19 naýryzynda jumystan shyqan Aıajan Edilova, sol kúıi úıine oralmaǵan. Qyzdyń joǵalǵany týraly habar 20 naýryzda tarady. Tanystary ony sońǵy ret jumysta kórgen. İzdeý jumystary birneshe kúnge sozylyp, 22 naýryzda ony asa qatygezdikpen óltirgeni belgili boldy. Boıjetkenniń bólshektengen denesi Nurkent yqshamaýdanyndaǵy páterlerdiń birinen tabylǵan. 

Aıajannyń ólimine kúdikti retinde er adam ustalǵan. Ol jábirlenýshimen birge kireberiste beınebaqylaý kameralaryna túsip qalǵan. Kúdikti 1993 jylǵy Túrkistan oblysynda týmasy.