Denaýlyq saqtaý mınıstri Alekseı Soı Qazaqstan mektepterinde balalarǵa, jasóspirimderge koronavırýsqa qarsy vaksına qashan jáne qaıda salynatynyn aıtty. Bul týraly  mınıstr úkimet otyrysynda habarlady.

– Balalarǵa vaksına bilim berý uıymdarynda jáne Qazaqstan boıynsha egý pýnkterinde salynady. Vaksına balalarǵa, kámeletke tolmaǵandarǵa, jasóspirimderge ata-ananyń nemese zańdy ókilderiniń kelisimi bolǵan jaǵdaıda ǵana salynady, – dedi Soı úkimet otyrysynda.

Mınıstrdiń aıtýynsha, Qazaqstanǵa Pfizer vaksınasynyń birinshi partıasyn 379 myń doza kóleminde 15 qarashaǵa deıin jetkizý josparlanǵan.

Qazaqstanda balalar men júkti áıelderge, emizýli balasy bar áıelderge vaksına salýdy qamtamasyz etý úshin 4 mıllıon 230 myń doza satyp alynǵan. Bul 2 mıllıon 115 myń adamdy qamtamasyz etýge jetedi.

Vaksına 12-17 jas aralyǵyndaǵy balalarǵa, júktiliktiń 16-37 aptasyndaǵy áıelderge jáne bosanǵanyna 42 kún bolǵan emizýli balasy bar áıelderge salynady.

10 qarasha keshke Qatar Airways áýe kompanıasy Pfizer vaksınasynyń partıasyn jetkizedi.