«Bolashaq» qory bastamashylyq etken «Ár bala mektepke barýǵa laıyqty» jobasy aıasynda aýtızmmen aýyratyn jáne basqa da mentaldy buzylystary bar 600 bala mektepke barýǵa múmkindik aldy, al 20 bala jetektep júrýdi qajet etpeı, synypta óz betinshe bilim ala alatyn jaǵdaıǵa jetti.

Bolashaqtyqtar 6 jyl ishinde 22 qalada 43 ınklúzıany qoldaý kabınetin ashyp, jabdyqtady. Onda 284 pedagog-assıstent jumys isteıdi. Olar damý erekshelikteri bar 600 balanyń oqýyna, áleýmettenýine, óz betinshe bilim alýyna kómektesedi.

«Ár bala mektepke laıyq» jobasynyń yqpalymen verbaldy emes balalardyń 90%-i sóıleýdi úırendi, al damý erekshelikteri bar 50 bala mektep, qalalyq, oblystyq jarystar men olımpıadalardyń júldegerleri atandy. 2000 maman men ata-ana ınklúzıvti bilim berý jáne minez-qulyqty qoldanbaly taldaý boıynsha oqytýdan ótti.

Bolashaqtyqtardyń saraptamalyq qoldaýymen Nursultan Nazarbaev Qory elimizdiń 8 óńirinde taǵy 16 ınklúzıany qoldaý kabınetin ashty.

«Bolashaq» qorynyń málimetinshe, elimizdegi mektepterde pedagog-assıstent laýazymy tek ótken jyly ǵana resmı túrde paıda boldy. Bul rette pedagog-assıstentti mektepterdegi laýazymdar tizilimine engizý boıynsha jumys 2016 jyly «Dara» QQ, «Ashyq álem» QQ, «Dorogoıý dobra» QQ, «Qasıetti jol» QQ, «Rodnıkı» abılıtasıalyq baǵdarlamalar ortalyǵy ókilderiniń, memlekettik organdardyń, Parlament depýtattarynyń jáne t.b. qatysýymen «Bolashaq» korporatıvtik qorynyń «Ár bala mektepke laıyqty» jobasynyń saraptamalyq keńesiniń jumysy sheńberinde bastaldy.

Pedagog-assıstent – ınklúzıvti bilim berý júıesindegi aıtarlyqtaı mańyzǵa ıe býyn. Ol sabaqta jáne ınklúzıany qoldaý kabınetinde oqý materıalyn meńgerýge kómektesedi, sondaı-aq, jaǵymsyz minez-qulyqty túzetedi jáne balanyń boıynda áleýmettený jáne qarym-qatynas daǵdylaryn damytady.
Kóbine damý erekshelikteri bar balalarda esirý, jylaý, qatty aıqaılaý jáne taǵy sol sıaqty jaǵymsyz minez-qulyq kezdesedi. Pedagog-assıstent aldymen balany osyndaı jaǵdaılarda ózin-ózi ustaı alýǵa úıretedi. 2020 jylǵa deıin pedagog-assıstentter basqa mamandardyń, atap aıtqanda, tárbıeshilerdiń, logopedterdiń, psıhologtardyń jáne taǵy sol sıaqty mamandardyń mólsherlemesimen jumys isteýge májbúr boldy. Bir jyldan astam ýaqyttan beri pedagog-assıstentter mektep pedagogtarynyń shtatyna resmı túrde qabyldandy. Osy ýaqyt ishinde olardyń ómirinde qandaı ózgerister boldy?

Máselen, pedagog-assıstent Zamzagúl Muqanova № 88 mektep-lıseıdiń ınklúzıany qoldaý kabınetinde 2019 jyldyń qarasha aıynda ashylǵannan bastap jumys isteı bastady. Odan bólek, ınklúzıany qoldaý kabınetinde taǵy 8 asıstent-pedagog jáne kabınet muǵalimi jumys isteıdi. Olar aýtızmmen aýyratyn, aqyl-oı men sóıleýiniń damýy tejelgen, serebraldy sal aýrýy, Daýn sındromy bar 10 balany oqytady.

Qazir Zamzagúl – ekinshi synyp oqýshysy Álibektiń pedagog-assıstenti. Ol ınklúzıany qoldaý kabınetine 2020 jyldyń qyrkúıeginde keldi. Balada jaǵymsyz minez-qulyq baıqalyp, oqý daǵdylary durys bolmady. Inklúzıany qoldaý kabınetine alǵash kelgende 5-10 mınýt ótkennen soń, ol úıge ketemin dep baıbalam salǵan. Bir jyl ótkennen soń Álibek Zamzagúldiń kómegimen qatarynan 5-6 sabaqqa qatysatyn bolǵan. Oqýdy jáne jazýdy úırenip, sabyrly bolyp, basqa oqýshylardyń mazasyn almaıtyn bolady. Onyń aıtýynsha, ár balanyń tilin durys taba bilý kerek.

«Pedagog-assıstent únemi fızıkalyq jáne emosıonaldy túrde kúızeliste bolady. Kelesi mınýttarda ne bolatynyn bilmeısiń, óıtkeni bala sizdi nuqyp ne uryp jiberýi múmkin. Ár balaǵa onyń dıagnozyna, daǵdylaryna, múmkindigine jáne minezine qaraı qarym-qatynas jasaısyń. Siz balamen dostasyp, onyń kóńil-kúıindegi ózgeristerdi sezinýińiz kerek. Erekshe qajettiligi bar balalarǵa daýys kóterip sóıleýge bolmaıdy. Erekshe qajettiligi bar balalarmen jumys isteıtin mamannyń pedagogıkalyq biliminen basqa, aldyn-ala boljaı alatyn, túrli jaıttarǵa daıyn bolý úshin túısigi de bolýy kerek», - deıdi pedagog-assıstent.

«Bolashaq» qorynyń jetekshisi Dınara Shaıjúnisovanyń aıtýynsha, barlyq pedagog-assıstentter jeke baǵdarlamalar boıynsha jumys isteıdi. Olardy qordyń kýratory ázirleıdi. Erekshe balalarmen sapaly jumys isteý úshin pedagogtardyń biliktiligin arttyrý maqsatynda arnaıy kýrs ashylǵan. Bul – Bilim mınıstrligi maquldaǵan ABA terapıasynyń birden bir kýrsy. Qazir Qazaqstannyń 15 óńirinen 1200-den astam maman bilim alýda. Alaıda, pedagog-assıstentterdiń shamadan tys júktemesiniń kóptigi jáne jalaqynyń tómendigi ózekti máselelerdiń biri bolyp otyr.

«Jumys júktemesin esepteý boıynsha reglamentterdiń bolmaýyna baılanysty pedagog-assıstentterdiń jalaqysy kóbinese bilim basqarmalary men mektep dırektorlarynyń sheshimderine baılanysty. Pedagog-assıstentterdiń 1 balany alyp júrgeni úshin ortasha jalaqysy keıbir óńirlerde bir aýysymda 35 myń teńgeni, al basqalarynda 80-90 myń teńgeni quraıdy. Pedagog-assıstentter arasynda jalaqynyń tómendigi men psıhoemosıonaldyq júktemege baılanysty mamandardyń jıi aýysýy baıqalady», - dep atap ótti ol.

Sondaı-aq, onyń aıtýynsha, pedagogıkalyq bilimi bar árbir maman pedagog-assıstent bola alady. Erekshe balalarmen jumys isteý boıynsha arnaıy bilim men daǵdylardy meńgerý qajet. Mektepte pedagog-assıstent tapqanmen, ol erekshe balalarmen jumys istegen tájirıbesi joq jas maman bolyp shyǵatyn jaǵdaılar bolady. Mundaı jaǵdaıda ınklúzıa formaldy qalypta ǵana bolady, ıaǵnı pedagog-assıstent bar, biraq balanyń daǵdysy damymaıdy. Sondyqtan mektep ákimshiligi pedagog-assıstentterdi oqytý úshin jaqsy jaǵdaı men múmkindikter jasaýy mańyzdy.

Qorda atap ótkendeı, bul máseleniń sheshilýi «Nur Otan» partıasynyń baqylaýynda bolady.