Májilis Tóraǵasy Nurlan Nyǵmatýlın Tuńǵysh Prezıdent kúnine arnalǵan «Elbasy. Táýelsizdik. Parlament» atty halyqaralyq konferensıada sóz sóılep, Qazaqstannyń Tuńǵysh Prezıdenti, Elbasy Nursultan Nazarbaevtyń strategıasynyń arqasynda Qazaqstan aıtarlyqtaı nátıjelerge qol jetkizgenin atap ótti.

Qazaqstan Respýblıkasynyń Tuńǵysh Prezıdenti kúnine arnalǵan Konferensıa bıyl elimizdiń Táýelsizdiginiń 30 jyldyǵy aıasynda ótýde.

Parlament Májilisi jyl saıyn dástúrli túrde Tuńǵysh Prezıdent kúnine oraı uıymdastyratyn forýmǵa Ázirbaıjan, Túrkıa, Ózbekstan, Reseı, Slovakıa, Eýropalyq Parlament, TúrkPA parlamentteriniń basshylary men depýtattary, Májilis jáne Senat depýtattary, memlekettik organdardyń, úkimettik emes uıymdardyń ókilderi men sarapshylar qaýymdastyǵy qatysty.

Konferensıany alǵysózben ashqan Májilis Tóraǵasy birneshe kúnnen keıin táýelsiz Qazaqstannyń qurylǵanyna 30 jyl tolatynyn,  bul taǵy bir tarıhı beles ekenin, elimiz baǵyndyrǵan árbir jeńis, tikeleı Elbasynyń atymen baılanysty ekenin atap ótti.

Sonymen qatar, Palata Spıkeri Tuńǵysh Prezıdentimizdiń «aldymen ekonomıka, odan keıin saıasat», – degen ustanymynyń arqasynda elimiz qıyndyqtardy jeńip, osy kezeńde qos Palataly kásibı Parlament Elbasynyń jáne Prezıdenttiń  zańnamalyq tiregi bolǵanyn aıtty.

– Bıyl el táýelsizdiginiń 30 jyldyǵymen qatar, Qazaqstan Parlamentiniń qurylǵanyna da 25 jyl toldy. Parlament osy 30 jyldyń ishinde, Elbasymyz Nursultan Ábishuly Nazarbaevtyń mańyzdy bastamalaryn zań deńgeıinde qoldap, barlyq reformalardy qajetti, sapaly zańdarmen qamtamasyz etti. Bul jumys qazirgi ýaqytta Memleket Basshysy Qasym-Jomart Toqaevtyń alǵan qoıǵan mindetterin oryndaý maqsatynda tıimdi jalǵasyp keledi. Búginde Parlamentten shyqqan árbir qujat halqymyzdyń, elimizdiń ekonomıkalyq, áleýmettik, saıası, mádenı damýynyń zańnamalyq tiregine aınaldy deýge bolady, – dedi Májilis Tóraǵasy.

Nurlan Nyǵmatýlın búginde Konstıtýsıalyq reforma nátıjesinde Parlamenttiń ókilettigi kúsheıtilgenin atap ótip, ótken jyly Memleket basshysynyń bastamasymen Parlamenttik opozısıa ınstıtýty engizilip, saıası básekelestikti kúsheıtý úshin «Saıası partıalar týraly»,«Saılaý týraly», «Parlament jáne onyń depýtattarynyń mártebesi týraly» zańdarǵa tıisti ózgerister engizilgenin atap ótti.

– Osynyń barlyǵy zań shyǵarý qyzmetine jańa serpin berip, kásibı Parlamenttiń bedelin arttyrdy. Qazirgi ýaqytta bizdiń zań shyǵarýshy organ barlyq áriptes memleketterdiń parlamentterimen tyǵyz qarym-qatynas ornatyp, halyqaralyq uıymdarmen turaqty baılanys jasap keledi, – dedi Palata Tóraǵasy.

Sondaı-aq, Nursultan Nazarbaev Prezıdentten bılik ókilettikterin Parlamentke jáne Úkimetke qaıta bólýdi kózdeıtin konstıtýsıalyq reforma júrgizý týraly bastama kótergenin atap ótken Palata Spıkeri osy reformaǵa Tuńǵysh Prezıdent bastamashy bolyp, jalpyhalyqtyq talqylaýǵa túskenin aıtty.

Májilis Tóraǵasy atap ótkendeı, osy arqyly Elbasymyz el úshin taǵdyrly máselelerdi sheshýde árqashan óz halqynyń pikirine súıenetinin taǵy da kórsetti. Osy rette, Nursultan Nazarbaev eldiń basshysy jáne barlyq demokratıalyq ózgeristerdiń basty bastamashysy bola otyryp, zamanaýı qazaqstandyq parlamentarızmniń avtory jáne negizin qalaýshy bolǵanyn atap ótti Palata Spıkeri.

Nurlan Nyǵmatýlın Parlament  halyqaralyq qoǵamdastyqta erekshe orny bar barlyq halyqaralyq jáne óńirlik parlamenttik qurylymdardyń belsendi qatysýshysy ekenin alǵa tartyp, qazaqstandyq depýtattar delegasıasy Parlamentaralyq odaq, TMD PAA, EQYU jáne Eýropa Keńesi Parlamenttik assambleıalary, UQSHU jáne NATO, Islam Yntymaqtastyǵy Uıymynyń Parlamenttik Odaǵy, Azıa Parlamenttik Assambleıasy, TúrkPA sıaqty beldi halyqaralyq uıymdar qyzmetine belsendi qatysatynyna toqtaldy.

Otyrysta Májilis Tóraǵasy  kele jatqan Tuńǵysh Prezıdent kúni  merekesimen jáne Qazaqstan Táýelsizdiginiń 30 jyldyq mereıtoıymen quttyqtap&

– Biz osy jetistiktermen toqtamaımyz. Bizdiń basty baǵytymyz – «Qazaqstan - 2050» damý Strategıasy. Elbasymyzdyń dana saıasatynyń, halqymyzdyń bereke-birliginiń arqasynda ol maqsatqa da abyroımen jetemiz dep senemiz, – dedi.

Májilistiń baspasóz qyzmeti